Agur tantiyatsinqankuna
30
Jaquépa tsurin Agurmi Itielta y Ucalta willar nirqan:2 Llapanpitapis mana tantiyakuq upanömi kaykä.
Imatapis mana tantiyaq runanömi kaykä.
3 Tantiyakuq kanäpäpis llapantaqa manami yachakushqätsu.
Santu Tayta Diospa yachatsikuynintapis llapantaqa manami shumaq musyätsu.
4 Manami pï runapis ciëluman aywaykur kutimushqatsu.
Tsaynöllami pï runapis wayrata aptarantsu,
ni lamarta jakunwan qepintsu
ni kay patsapa lindërunkunata churashqatsu.
Pillapis ruranqanta musyarqa mä jutinta willamay.
Tantiyakuq karqa mä tsurinpa jutintapis willamay.
5 Tayta Diosqa tsapanmi payman yärakuqkunata.
Llapan awninqanta payqa imaypis cumplinmi.†
6 Paypa palabranman kikikipa yarpaynikita ama yapaytsu.
Yapaptikiqa ollqutupäshurnikimi castigashunki.
Tsaynöpami musyakanqa llullakuq kanqayki.
7 Tayta Dios, kawanqäyaq ishkay cösallatami mañakamü.
8 Tantiyaykatsillämay pitapis mana llullapänäpä.
Ama imaykayuqta tikratsimaytsu ni imaynaqta tikratsimaytsu.
Tsaypa trokinqa qoyay qoyay ministinqäkunata kamaripaykallämay.†
9 Imaykayuq tikrarqa capazchi qonqarpis qonqayküman.
Muchuq tikrarqa suwakurnin penqakuymanpis churaykümanchi.
10 Wätay llutanta ruraptin patronninta imatapis ama willapaytsu.
Willapaptikiqa tsay wätay maldicionarpis maldicionaykushunkimanchi.
11 Wakin runakunaqa mamantawan taytantami maldicionayan.
12 Wakin runakunaqa jutsayuq kaykarpis jutsaynaq tukuyanmi.
13 Wakin runakunaqa llapanpita mas alli kayanqanta yarparmi runa mayinta nanaq ñawinpa rikapäyan.
14 Wakin runakunaqa ayrajashqa karmi muchuqkunapa imaykankunatapis qechur qarapachäyan.
Mana kuyapäkuq kayaptinmi paykunapaqa kirunpis espädanörä y curmïllunpis puñalnörä.
15 Ayrajash runaqa imayka yawar shoquq kurunömi kaykan.
Tsay runaqa aykata chaskirpis manami contentakuntsu.
Tsaynöpis kimsa cösa y juk masmi kaykan mana contentakuqkuna.
16 Tsaykunami kaykäyan sepultüra, qolluq warmi, tsaki chakra y nina.
17 Taytanta penqakuyman churaqkunata y maman yätsinqanta mana chaskikuqkunataqa ñawintapis wiskurkuna jipiyätsun.
Condorkunapis kawaykaqta mikuyätsun.
18 Kimsa cösa y juk masmi mana tantiyaypä kaqkuna.
19 Tsaykunami kayan anka imanö pajanqan,
rumi jananpa culebra imanö purinqan,
lamar jananpa büqui imanö aywanqan
y ollquwan warmi imanö wamrata ruranqanpis.
20 Runan qanrataq warmiqa juk runawan punuskirpis manami penqakuntsu.
Tsaymi nin: “Noqaqa manami imatapis llutantaqa rurashqätsu”.
21 Kay patsacho kimsa cösa y juk masmi kaykan runakunata mana gustanqan.
22 Tsaykunami kaykan juk wätay rey kayman yaykunqan,
mana tantiyakuq runa imaykayuq tikranqan,
23 manakaqman churashqa warmi runayuq kanqan
y patrönanpa trokin wätay warmi patröna kanqan.
24 Kay patsacho chusku akapalla kaqkunami tantiyaqpitapis mas tantiyakuq.
25 Tsaykunami kaykan ñuyäshukunaa (paykunaqa kallpaynaq karpis usya witsanmi mikuyninta churakuyan),
26 wishkashkuna (paykunaqa kallpaynaq karpis ranrakunachömi wayinta rurakuyan),
27 chukllushkuna (paykunaqa mandaqnin rey mana kaykaptinpis qatinayllamanmi puriyan)
28 y arashkuna (paykunaqa aja tsariy mana karpis reypa palaciunmanmi yaykuyan).
29 Kimsa cösa y juk masmi kaykan runa tukuq puriqkuna.
30 Tsaykuna kaykan león (leonqa llapan uywapitapis mas mantsaypä y imapitapis manami qeshpintsu),
31 ichiykachaq gällu,
yayan chïvu
y soldädukunapa puntanta aywaq rey.
32-33 Lichipa ritishninpitami mantequïllata ruran.
Jinchi wishqakuptinqa yawarmi yarqun.
Tsaynöllami piwanpis wajupänakurqa ajätsinakuyan.
Mana tantiyakuypa runa tukur pitapis wajuparqa tsaykunata tantiyakuy.