Mandaq Lemuelta maman yätsinqan
31
Rey Lemueltami yätsir maman nirqan:2 Hïju, wamrä kaptikimi pasaypa kuyä.
Tayta Diospa bendicionninwanmi kay patsaman apamushqä.
Tsaymi kanan yätsishayki.
3 Warmikunaman umayki churakashqa ama puriytsu.
Tsaynö puriyanqanchömi reykunapis llutan ruraykunaman churakäyan.
4 Tsaynöpis manami allitsu reykuna y autoridäkuna upyallar kayanqan.
5 Machaskirqa Tayta Diospa leyninkunata qonqaskirmi ñakaqkunapa contran imatapis rurayan.
6 Vïnuta ni ima machätsikuqtapis ama upuytsu.
Tsaykuna kakutsun llakishqa y qallayashqa kaqkunapä.
7 Muchuq kayninta y llakikuyninkunata qonqäyänanpä tsaykunata upukuyätsun.
8 Pïninpis mana kaqkunapa janan shäriy.
Muchuqkunata pipis ñakatsinanta ama munaytsu.
9 Muchuqkunapa y qollmi shonqukunapa janan shärir alli juzgay.
Arukuq warmita alabanqan
10 Arukuq warmitaqa manami rasllaqa tarintsiktsu.
Tsaynö warmiqa ima alhäjapitapis masmi välin.
11 Alli warmimanqa runanpis pasaypami yärakun.
Arukuq warmiwan tarqa manami muchunqatsu.
12 Alli warmiqa qoyay qoyaymi runanta yanapan.
13 Tsaynö warmiqa millwatawan lïnuta ashiskirmi kushishqa putskakun.
14 Negociu puritsiq büquinömi ministinqanta maytsaypitapis apamun.
15 Tsaka tsakalla shärikuskirmi wawankunatapis wätayninkunatapis mikuyta qaran.
16 Shumaq rikapaykurmi chakratapis rantin.
Arur qorinqan qellaywanmi tsayman üvata plantatsin.
17 Kushi kushillami mana qelanaypa arun.
18 Negociunta rantikunanpäpis shumaqmi yarpachakun.
Tsakaypapis aktsita tsarirkatsirmi rurayninkunata rurakun.
19 Kikin putskaskirmi awatapis awakun.
20 Alli shonqu karmi imaynaqkunata yanapan y muchuycho kaykaqkunata imallanpis qaran.
21 Wayincho kaqkunatapis rakta raktami jatitsin.
Tsaymi rashta rataptinpis llakikuntsu.
22 Kikinmi bayëtatapis awan.
Latsapatapis allillatami jatikun.
23 Runantapis marka mayinkuna respitayanmi.
Tsaymi runanqa nacionnincho mandaqkunawan y mayor runakunawanpis qorikan.
24 Negociantikunata rantikunanpämi latsapatapis ruran y wachukutapis awan.
25 Pïmaypitapis respitatsikunmi.
Waray warantin imanö kawananpäpis shumaq yarpachakuskirmi kamarikun.
26 Manakaqkunataqa imaypis manami parlantsu.
Alli shimillanpami shumaq yachatsin.
27 Wayicho rurayninkunata mana jamaypami ruran.
Mana arurqa imatapis manami mikuntsu.
28 Wawankunapis y runanpis alabarninmi niyan:
29 “Wakin warmikuna alli kayaptinpis qammi llapanpitapis mas alli kanki”.
30 Allish chïna kanqanpis manakaqllapämi.
Kuyayllapä kanqanpis ushakaqllami.
Tsaynö kaptinpis Tayta Diospita mantsapakuq warmimi itsanqa alabashqa kanqa.
31 Arukuq kanqanpita payta alabayay.
Tsaynöpis llapan rurayninpita felicitayay.