28
Jutsa ruraq runaqa pipis mana qatikachaykaptinmi qeshpir aywakun.Alli runami itsanqa imayka leonnö imatapis mantsantsu.†
2 May nacionchöpis mana alli kawayaptinqa atska autoridätarämi ministiyan.
Autoridä yachaq karqa llapantapis kanqanmanmi churan.
3 Muchuqkunata ñakatsiq mana alli runaqa poquraykaq mikuyta juchu apaqnömi kaykan.
4 Leyta mana cäsukuq runaqa mana alli runatami alaban.
Leyta cumpliq runami itsanqa mana alli runata cäsupantsu.
5 Mana alli runakunaqa allita rurayänanpä kaqta manami tantiyakuyantsu.
Tayta Diosta ashiqkunami itsanqa alli kaqkunata rurayänanpä tantiyakuyan.
6 Imaykayuq kaykar yatapakuq kanqanpitaqa mas allimi kanman muchuq karpis mana yatapakuq kanqan.†
7 Tayta Diospa leyninkunata cäsukuq runaqa tantiyakuqmi kaykan.
Alläpa mikuq runakunawan puriq runaqa taytantami penqakuyman churan.
8 Qellayninpa wachayninwan imaykayuq tikraq runaqa manami tsay qellayta provichanqatsu.
Tsaypa trokinqa muchuqkunata kuyapaq runami provichanqa.†
9 Tayta Diospa leyninkunata mana cäsukuq runataqa mañakunqantapis Tayta Dios manami chaskinqatsu.
10 Jutsata rurananpä yätsikuq runaqa kikinpis jutsa ruraymanmi chanqa.
Jutsata mana rurananpä tantiyatsiq runami itsanqa alli kawayman chanqa.
11 Imaykayuq runaqa yachaq kanqantami yarpan.
Muchuq karpis yachaq runami itsanqa tsay imaykayuq runa imanö kanqantapis musyan.
12 Alli runa gänaptinqa pïmaypis kushikurmi fiestata rurayan.
Mana alli runa gänaptinmi itsanqa pïmaypis mantsarir pakakuyan.†
13 Jutsa ruranqanta mana reconöciptinqa manami ima ruranqanpis allitsu kanqa.
Jutsa ruranqanta reconöcir kachariptinmi itsanqa Tayta Dios perdonanqa.
14 Tayta Diospita imaypis mantsapakuq runaqa kushishqami kawan.
Mana cäsukuq runami itsanqa ñakayman chanqa.
15 Imayka mallaqashqa ösunö o mallaqashqa leonnömi mana alli autoridäqa muchuqkunata ñakatsin.
16 Mana tantiyakuq autoridäqa mandanqan runakunatapis mana kuyapaypami ñakatsin.
Mana suwakuq autoridämi itsanqa atska wata kawanqa.
17 Wanutsikuq runaqa qeshpi qeshpillami wanunqanyaqpis purinqa.
Tsay runapa janan ama pipis shäritsuntsu.
18 Alli runaqa ima desgraciapitapis salvakunmi.
Mana alli runami itsanqa desgraciaman chanqa.
19 Arukuq runapaqa mikuyninpis ujükunqamia.
Qela runakunawan takukaqkunami itsanqa mikunanpäpis tarintsu.
20 Yärakuypä runaqa alabashqami kanqa.
Juklla imaykayuq kayta munaq runaqa llutan ruraykunamanmi jatikanqa.
21 Juzgarqa pitapis mana jananpaypa juzganki.
Wakin juzgaqkunaqa imatapis chaskinan raykuqmi jutsa ruraqpa janan shäriyan.
22 Ayrajashqa runaqa imaykayuq kayllapämi yarpachakun.
Manami musyantsu ayrajash kanqanpita muchuyman chänanpä kanqanta.
23 Wakinqa mana allita ruraptiki alabashunaykipa trokin corrigishunkimi.
Corrigishunqaykita qallayarpis nirkurrämi tantiyakunki allipä kanqanta.
24 Taytantawan mamanta suwapaskir “manami jutsata rurashqätsu” niq runaqa wanutsikuq runapa yanapaqnin kanqannömi kaykan.
25 Imaykapäpis ayrajashqa runaqa piwanpis rimanakullarmi kawan.
Tayta Diosman yärakuq runaqa imaykayuqmi kanqa.
26 Kallpanman y yachaq kayninman yärakuq runaqa mana tantiyakuqmi kaykan.
Tantiyakuq runaqa imapitapis salvakunqami.
27 Muchuqkunata yanapaqpaqa manami imanpis pishinqatsu.
Muchuqkunata mana yanapaqtami itsanqa pïmaypis maldicionanqa.
28 Mana alli runakuna mirayaptinmi runakuna mantsariyan.
Tsay runakuna ushakäyaptinqa kushikuyanmi.†