27
“Kaytami waktami waray rurashä” nir ama alabakuytsu.Manami musyankitsu waray junaq ima päsashunaykipä kanqantapis.†
2 Kikiki alabakunqaykiqa manami allitsu.
Mas allimi kanman juk alabashuptiki.
3 Rumipis y aqushapis pasaypami lasan.
Tsaypita peorrämi mana tantiyakuq runa ajananqan.
4 Rabyakuq runaqa pitapis manami kuyapantsu.
Ajanaq runaqa imatapis ushakätsinmi.
Envidiösu runaqa rabyanaq y ajanaq runapitapis peormi kaykan.
5 Wakin runakunaqa amïguyki kaykarpis llutanta ruraptiki manami imatapis nishunkitsu.
Tsaynö kaptinpis wakinmi itsanqa alli kawanaykita munar yätsishunki.
6 Qallayänayki kaptinpis amïguyki corrigishunqaykiqa allimi kaykan.
Tsaynö kaptinpis chikishuqniki runaqa mana allita ruraptikipis alabashunkimi.
7 Pacha junta mikushqa runaqa abëjapa mishkintapis manami munannatsu.
Mallaqpä kaykaq runami itsanqa ayaq mikuytapis mishkilla mikuskin.
8 Yurinqan markanta jaqiskir purikuq runaqa qeshunta jaqiriykur aywakuq pishqunömi kaykan.
9 Mushkuq perfümi shonquta kushitsinqannömi alli amïgupa yachatsikuyninpis kushikuypä kaykan.
10 Ima problëmachöpis karqa karucho kaq wawqikiman aywanaykipa trokin amïguykiman o taytaykipa amïgunman aywar willanki.
Mas allimi kanman karucho kaq castaykipitaqa cercaykicho kaykaq vecïnuyki yanapashuptiki.
11 Hïju, yachaq kaptikiqa kushishqami kawashä.
Tsaynöpami penqakuyman churamaqkuna upällakuyanqa.
12 Tantiyakuq runaqa ima peligrupitapis witikunmi.
Mana tantiyakuq runami itsanqa peligru kanqanta rikaykarpis jatikan.
Tsaynöpami imayka desgraciamanpis jeqarpun.†
13 Jäpa runapa garantian yaykuqpataqa latsapantapis prenda qechuya.
Tsay prendata tsararanki jaqanta päganqanyaq.†
14 Tsaka tsakalla büllata rurar amïgunta winchikurqa runa mayinta ashlliqnömi kaykan.
15 Tamya witsan jutuq wayinömi imallapitapis ajanaykachaykaq warmiqa kaykan.†
16 Tsay niraq warmitaqa wayrata tsapayta mana kamäpakunqaykinö y aceitita maki paltaykicho tsararayta mana kamäpakunqaykinömi upällatsiytapis kamäpakunkitsu.
17 Lïmawan fiërruta afilanqannömi tantiyakuq runaqa runa mayinta tantiyatsin.
18 Hïgusta täpaq runaqa wayuyninta mikurmi kushikun.
Patronnin ninqanta cäsukuq runapis alli rikashqa karmi kushikun.
19 Yakucho qaqllanta rikaqnömi runatapis qaqllallancho reqiskintsik imanö kanqantapis.
20 Wanuypis ni sepultürapis manami contentakuyantsu atska wanuqkunata pampayaptinpis.
Tsaynöllami mallaqashqa runapis imaykata qorirpis contentakuntsu.
21 Qoritapis yuraq qellaytapis alli kanqanta musyantsik ninawan tsullutsirrämi.
Runatapis alli kanqanta musyantsik alli kanqanpita alabayaptinmi.†
22 Mana tantiyakuq runaqa trïguta wiruqnö mayjina wiruptinpis kanqallanmi kaykan.
23 Üshaykikunata shumaq mitsiy.
Cabraykikunatapis shumaq rikay.
24 Imaykayuq kaypis corönayuq kaypis päsaqlla kanqannömi uywaykikunapis ushakaqlla kaykan.
25 Qewa lloqllur verdiskiptin
y jirkakunacho achunqayki qewata üshaykikunata qaraptikiqa
26 millwan allimi kanqa latsapaykikunata ruranaykipä.
Cabraykikunapis mirayanqami rantikuskir chakrata rantinaykipä.
27 Cabraykikunapa lichinpis atskami kanqa wayikicho kaqkunawan y arupäshuqnikikunawan upuyänaykipä.