Salomón yachatsinqan wakin proverbiukuna
25
Kay qellqanqankunapis rey Salomón ninqan proverbiukunami kaykan. Kay proverbiukunata qoriskirmi Judá nacioncho rey Ezequíaspa yanapaqninkuna qellqayarqan.2 Runa mana tantiyanqankunataqa Tayta Diosmi musyan.
Runakuna mana tantiyaptinpis reyqa yarpachakurmi tantiyan.
3 Ciëlupa altun mayyaq kanqanta,
patsapa rurin mayyaq kanqanta
y rey imata yarpanqantapis manami pipis musyantsu.
4 Yuraq qellayta tsulluskatsir qanranta jipiskirmi tsay qellaypita kuyayllapä cöpata rurayan.
5 Tsaynöllami mana alli runata qarquskirqa añawna rey mandanqa.
6 Reypa ñöpancho ama yachaq tukuytsu.
Mayor runakuna jamakuyänan kaqman ama jamakuytsu.
7 Tsaypa trokinqa qayayäshuptikirä paykuna jamaräyanqanman jamakunki.
Mayor runakuna rikaykaptin jipishuptikiqa pasaypa penqakushqami yarqunki.†
8 Imatapis manarä shumaq musyarqa jukllaqa autoridäkunaman willakuq ama aywaytsu.
Juklla willakuptikiqa qepaykita shamuq runa juknö niptin manami ima niytapis kamäpakunkitsu.
9 Contraykiwan rimanakur paqtä pipis yärakushurniki willashunqaykita parlankiman.
10 Willaptikiqa penqakuymanmi churashunki.
Tsaynöpaqa mana allichömi quëdanki.
11 Shumaq tantiyaykur tiempuncho alli parlanqaykiqa yuraq qellaywan adornashqa qori manzänanömi kushikuypä kaykan.
12 Yachaq runapäqa tantiyakuq runa yätsinqan qoripita rurashqa sortïjanö y qoripita rurashqa wallqanömi kaykan.
13 Achaptin alaq yakuta upur yakunashqa runa kushikunqannömi willakuq yärakuypä kaptin mandaqnin kushikun.
14 Wayra puritsinqan usya pukutaynömi imatapis qarananpä awnirkur mana cumpliq runaqa kaykan.
15 Pacienciakuq runaqa ajanashqa kaykaqtapis ajanayninta qallqütsinmi.
Alli shimillanpa shumaq parlaparmi contrantapis yarpachakatsin.
16 Abëjapa mishkinta tarirqa alläpa ama mikunkitsu.
Alläpa mikurqa shonqutami tikratsinki.
17 Amïguyki kaptinpis alläpaqa wayinman ama aywapankitsu.
Alläpa aywapaptikiqa ajayäshunkimi.
18 Garrutinö, cuchillunö y flëchanömi amïgunpa contran parlaqkunaqa kaykan.
19 Llakikuycho kanqayki höra traicionëru runaman ama yärakuytsu.
Payman yärakurqa chakiki pakishqa kaykaqnö y kiru nanaywan kaykaqnömi kanki.
20 Llakishqa kaykaqta ama cantapaytsu.
Payta cantaparqa qeriman kachita wiñapaqnö y alaycho latsapanta jipitsiqnömi kaykanki.
21 Chikishuqniki mallaqaptinqa mikuyta qaraykuy.
Yakunaptinqa yakuta makyaykuy.
22 Tsaynö ruranqaykipita Tayta Diosmi pägashunki.
Chikishuqniki runami itsanqa pasaypa penqakunqa.†
23 Norti kaqläpita wayrämuptinmi imaypis tamyan.
Tsaynöllami runa mayinpa contran parlaptin pipis ajanan.
24 Ajanaykachaykaq warmiwan kuyayllapä wayicho tänanpa trokinqa mas allimi kanman tsukllallachöpis kushishqa täkunqan.†
25 Pasaypa yakunaykaq runapä yaku kushikuypä kanqannömi karu markapita apamunqan willakuypis kushikuypä kaykan.
26 Chuya yakuman putka yaku tallukanqannömi jutsaynaq runa jutsa ruraq runakunawan takukanqan kaykan.
27 Alläpa mishkita mikuptiki däñashunqaykinömi runakuna alläpa alabayäshunqaykipis mana alli kaykan.
28 Murallanni marka peligrucho kanqannömi geniunta controlakuyta mana puëdiq runapis peligrucho kaykan.