6
23
Mandaq runawan mikurqa shumaq tantiyakunki pipa ñöpancho kaykanqaykitapis.2 Mayjina mallaqarpis awantakunki.
3 Alli alli mikuyta rikarpis ama munapankitsu.
Capazchi engañashunaykipäpis mikuyta churapaykäshunki.
7
4 Imaykayuq kanaykillapäqa ama alläpa yarpachakuytsu.
5 Shumaq tantiyakuskiptikiqa imaykayuq kaypis ushakaqllami kaykan.
Anka pajar aywakuqnömi imaykaykipis ushakanqa.
8
6 Micha runapa wayinman mikuq ama aywaytsu.
Alli allita kusinaptinpis ama munapaytsu.
7 Payqa imanö mikunqaykitapis rikapäshunaykipämi janan shonqulla “shamunki mikunantsikpä upunantsikpä” nishunki.
8 Janan shonqulla qayatsishunqaykita tantiyakur mishkilla mikuskirpis penqakunkimi.
Shumaq alabanqaykipis wallällapämi kanqa.
9
9 Mana tantiyakuq runataqa imatapis ama yätsiytsu.
Yätsinqaykitapis manakaqmanmi churanqa.
10
10 Unaypita patsa kaykaq lindërukunata ama wititsiytsu.
Waktsakunapa chakranman ama jatikankitsu.
11 Jatikaptikiqa munayyuq Tayta Diosmi paykunapa janan shärir castigashunki.
11
12 Yachatsiyäshunqaykita llapan shonquykiwan chaskikuy.
Yätsiyäshunqaykitapis shumaq wiyakuy.
12
13 Wamrata shumaq corrigiy.
Juk ishkay maki asutanqaykiwanqa manami wanuskinqatsu.
14 Tsaypa trokinqa wanuypitami salvanki.
13
15 Hïju, yachaq runa rikakuptiki noqami mas kushikushä.
16 Alli kaqkunallata parlanqaykita wiyar pasaypami kushikushä.
14
17 Jutsa ruraq runakuna imaykayuqpis kaptin ama chikipaytsu.†
Tsaypa trokinqa ñakaq karpis Tayta Diospita mantsapakuy.
18 Tsaynöpami imaypis alli kawanki.
Llapan munanqaykitami tarinki.
15
19 Hïju, yätsinqäta shumaq wiyamay.
Tantiyakuskir imatapis shumaq ruray.
20 Upyaq runawan y alläpa mikuq runawanqa ama takukaytsu.
21 Upyaqkuna y alläpa mikuqkunaqa pasaypa muchuqmi rikakuyan.
Tsaynöllami qela runapis latsapanta oqraykun.
16
22 Taytayki yätsishunqaykita shumaq chaskikuy.
Mamayki chakwanyaptinpis manakaqman ama churaytsu.
23 Rasunpaypa tantiyakuq kanaykipä imanöpapis yachakuy.
Tantiyakuq kanqaykitaqa imaypis ama jaqiytsu.
24 Tsurin alli portakuptin taytan kushishqami kawan.
Shumaq yachakuptin orgullösumi purin.
25 ¡Mamaykiwan taytayki kushikuyänanpä alli kaway!
“Wamrä alli yachaqmi” nir kushikuyätsun.
17
26 Hïju, llapan shonquykiwan cäsukamay.
Imanö kawanqätapis rikamay.
27 Prostitüta warmiqa patsapa shiminnö mantsariypämi kaykan.
28 Tsay niraq warmiqa uywakunata shuyaraq leonnömi runakunata perditsinanpä shuyaraykan.
18
29 ¿Pikunatä alläpa ñakayan?
¿Pikunatä alläpa llakikuyan?
¿Pikunatä pasaypa rimanakur y qallayätsinakur puriyan?
¿Pikunatä manakaqllapita pelyayan y ñawinkunapis qoyullana puriyan?
30 Paykunaqa upyallaman churakashqa runakunami kayan.
Machätsikuqkunata tallu tallurkurmi imaypis upyayan.
31 Cöpacho vïnu pukaypa pukar munapaypä kaptinpis ama upunkitsu.
33 Machaskirqa imallatapis rikapakunkimi.
Tsaynöpis manakaqkunata parlarmi purinki.
34 Umaykipis pasaypami jirurunqa.
Büqui chawpincho ichiraykaq qeru puntanman yarkuptiki umayki jiruruqnömi tikranki.
35 Tsaymi ninki:
“Maqamaptinpis manami nanayta mayashqätsu.
Asutamaptinpis manami cuentata qokushqätsu.
Rikchaskamurqa uma jampiqrächi aywashä”.