22
Qellayyuq y qoriyuq kaypitapis mas alli kaykan pïmaypitapis alli rikashqa kaymi.2 Imaykayuqtapis muchuqtapis Tayta Diosmi kamashqa.†
3 Shumaq yarpachakuq runaqa ima peligrupitapis qeshpinmi.
Mana yarpachakuq runami itsanqa desgraciaman chan.†
4 Tayta Diospita mantsapakuq qollmi shonqu runaqa imaykayuqyanqami, pïmaypitapis alli rikashqami kanqa y alli kawaytami tarinqa.
5 Mana alli runataqa ima desgraciapis päsanmi.
Alli runaqa tsaykunapita salvakunmi.
6 Wamrataqa wamra kanqanyaqlla alli kawananpä shumaq yachatsiy.
Yachakunqantaqa yäkuqyarpis manami qonqanqatsu.
7 Muchuqkunataqa imaykayuq runami munaynincho tsararan.
Jaqa tukuqkunataqa mañaqninmi munaynincho tsararan.
8 Mana alli runaqa jutsata ruranqanpitami ñakanqa.
Tsay niraq runataqa Tayta Diosmi ajanarnin ushakätsinqa.
9 Muchuqkunata kuyapar imallatapis qaraqkunaqa bendiciontami chaskiyanqa.
10 Wajukuq runata qarquriptikiqa manami chikinakuy, rimanakuy ni ashllinakuypis kanqanatsu.
11 Rasun kaqta parlaq runataqa rey kuyanmi.
Alli shimillanpa parlaq runaqa reypa amïgunmi kaykan.
12 Tantiyakuq runataqa Tayta Diosmi imapitapis tsapan.
Llullakuq runatami itsanqa pasaypa penqakuyman churan.
13 Qela runaqa aruyta mana munarmi nin:
“Leonmi nänicho mikumanqa”.†
14 Runanta qanrataq warmipa kuyakuyninqa imayka patsapa shiminnömi mantsariypa kaykan.
Tsay warmiwan punuq runaqa Tayta Diostami ajanätsin.
15 Wamraqa mana wiyakuq karmi llutankunata ruran.
Tsaynö kaqkunaqa castigaptinrämi llutan rurayta kacharin.
16 Imaykayuq tikranan raykuq muchuqta engañar o imaykayuqman qaraynin aparqa ñakaymanmi chanqa.
Yachaq runakunapa kimsa chunka (30) yachatsikuyninkuna
17 Yachaq runakuna yätsiyäshunqaykita chaskikuy.
Paykuna yätsiyäshunqaykinölla imatapis ruray.
18 Yachatsiyäshunqaykita imaypis yarparanki.
Tsaymi pitapis tantiyatsinaykipä imay hörapis listu kaykanki.
19 Tayta Diosman imaypis yärakunaykipä yätsishayki.
20 Qampämi qellqaykä kimsa chunka (30) yachatsikuykunata.
Tsaychömi kaykan tantiyatsikuykunawan yätsikuykunapis.
21 Tsaykunata yachakuskirmi tantiyakuq kanki.
Tsaymi pipis tapushuptiki rasun kaqllata ninki.
1
22 Muchuykaqta rikaykar pitapis ama suwapankitsu.
Pïninpis mana kaqkunata juezpa ñöpancho ama tumpankitsu.
23 Tayta Diosmi muchuqkunapa janan shärinqa.
Muchuqkunata qechuqkunataqa kikintami imaynaqta tikratsinqa.
2
24 Mana alli runawan y ajanaq runawanqa ama takukankitsu ni amïgutapis rurankitsu.
25 Paykunawan takukarqa mana alli costumbrinkunatami yachakunki.
Paykunanö kawarqa kunkaykiman waskata churaqnömi kanki.
3
26 Pipa jaqantapis päganaykipä ama garantian yaykunkitsu.
27 Tsay jaqata päganaykipä mana kaptinqa cämaykitapis qechushunkimi.
4
28 Unay castaykikuna lindëru churanqanta ama wititsinkitsu.†
5
29 Alli arukuq runaqa mandaqkunapa yanapaqninmi kanqa.
Manami común runakunapa munayninchötsu kanqa.