21
Mayuta maypa aywananpäpis Tayta Dios kamakätsinqannömi reypa yarpayninkunatapis kamakätsin.2 Runaqa yarpan llapan ruranqan alli kanqantami.
Tayta Diosmi musyaykan rasunpaypa alli yarpaywan o mana alli yarpaywan ruranqantapis.†
3 Mas allimi kanman sacrificiuta rupatsinqaykipa trokin Tayta Dios munanqannö runa mayikiwan alli kawanqayki.†
4 Jutsami kaykan runa mayinta nanaq ñawinpa rikapanqan, yachaq tukunqan y llutanta yarpachakunqan.
5 Imallatapis shumaq yarpachakuskir ruraptinqa allimi kanqa.
Mana yarpachakuypa imatapis llutalla ruraptinqa mana allimi kanqa.
6 Runa mayinta sakyar imaykayuq tikranqanqa qoshni ushakanqannömi ushakanqa.
Tsaynö ruranqanpitami wanuyta tarinqa.
7 Mana kuyapäkuq kanqanpitami mana alli runaqa ushakanqa.
Runa mayinta ñakatsinqanpitami kikinpis ñakanqa.
8 Mana alli runapa kawayninqa wiksu qerunömi kaykan.
Alli runapa kawayninmi itsanqa shutu qerunö kaykan.
9 Ajanaykachaykaq warmiwan kuyayllapä wayicho tänanpa trokinqa mas allimi kanman tsukllallachöpis kushishqa täkunqan.†
10 Mana alli runaqa imaypis llutankunata ruranallanpämi yarpachakun.
Tsay runapaqa kuyapäkuyninpis manami kantsu.
11 Mana yachaq runaqa shimisapa runata castigaqta rikarrämi tantiyakun.
Yachaq runami itsanqa yätsiyanqallanwan tantiyakun.†
12 Tayta Diosqa rikaykanmi llutan ruraq runa wayincho imanö kawanqantapis.
Ima desgraciapis päsananpämi kachariykun.
13 Muchuqkuna mañakuptin mana kamaripaq kaqtaqa Tayta Diospis manami cäsunqatsu.
14 Pasaypa ajanashqa kaykaqta pakayllapa imallatapis qaraykurqa rabyanayninta qallqütsinqami.
15 Alli runaqa autoridäkuna shumaq arreglayaptin kushikunmi.
Mana alli runami itsanqa pasaypa mantsarin.
16 Tantiyakuq kananpa trokin llutanta ruraq runaqa manaräpis unaytami ushakanqa.
17 Fiestallacho, upyallacho y perfümillacho imaykankunatapis ushaq runaqa imaynaqmi kanqa.
18 Llullakuq y willapäkuq runataqa alli runapa contran shärinqanpitami kikinta ima desgraciapis päsanqa.
19 Malgeniu y mana alli warmiwan tänanpa trokinqa mas allimi kanman japallan täkuptin.
20 Yachaq runapa wayinchöqa imaykapis y perfümikunapis kanmi.
Mana yachaq runami itsanqa tarinqallantapis llapanta ushakurkun.
21 Shumaq tantiyakuq y kuyakuq runaqa alli kawaytami tarinqa.
Tsaymi pïmaypis payta alli rikan.
22 Alli yachaq runaqa atska soldäduyuq markata vincirmi munayninman churan.
Tsaynö churan pipis mana vincinanpä kanqanta yarpaykäyaptinmi.
23 Llutalla mana parlaq runaqa ima problëmamanpis manami yaykuntsu.
24 Runa mayinta manakaqman churaq runataqa yachaq tukuq, orgullösu y respëtuynaq kanqantami niyan.
25 Qela runaqa aruyta mana munarmi mallaqaypita wanun.
Qela karmi aruyta mantsan.
26 Tsay runaqa kikillanpä yarpachakuykarmi qoyarkun.
Alli runami itsanqa runa mayinta imallatapis kushishqa qaraykun.
27 Mana alli runakunapa ofrendantaqa Tayta Dios manami chaskintsu.
Paykunaqa ofrendata apayan Tayta Dios yanapananta munarmi.†
28 Manakaqta parlaq testïgutaqa parlanqantapis manami criyiyantsu.
Rasun kaqta parlaq testïgutami itsanqa parlanqanta imaypis criyiyan.
29 Mana alli runaqa runakuna rikayänallanpämi alli tukun.
Alli runami itsanqa rasunpaypa allillata ruran.
30 Tayta Diosta mana cäsukuptinqa yachaq kanqanpis, tantiyakuq kanqanpis ni yätsikuq kanqanpis manami välintsu.
31 Guërraman aywaq runaqa cawalluntapis shumaqmi kamarikun.
Tayta Dios yanapaptinmi contrankunata vincin.†