20
Runaqa vïnuta upukurkurmi pitapis achäquita ashipan.Machanqanyaq imatapis upyakurkurmi piwanpis pelyan.
Tsay runaqa mana yachaq karmi llutanta ruran.
2 Rey ajananqanqa león qayaranqannömi mantsariypä kaykan.
Tsaynö kaykaqtaqa wanuyta ashillarmi pipis achäquita ashipan.
3 Mana rimanakuq runaqa pïmaypitapis respitashqami kanqa.
Mana tantiyakuq runaqa llutallami piwanpis rimanakun.
4 Qela runaqa murukuy witsan manami arukuntsu.
Tsaymi cosëcha witsan mayjina ashirpis tarinqatsu.
5 Mayu rurincho ima kanqanpis mana rikakanqannömi runa imata yarpanqanpis musyakantsu.
Tsaynö kaptinpis yachaq runami itsanqa runa imata yarpaykanqantapis tantiyan.
6 Atskaqmi yarpäyan alli runa kayanqanta.
Tsaynö kaptinpis rasunpaypa yärakuypä runata ¿pirä tarinman?
7 Taytan alli runa kaptinqa tsurinkunapis kushishqami kawayan.
8 Reyqa juzgananpä trönunman jamar mayqan jutsayuq kanqantapis jukllami tantiyaskin.
9 Manami pipis ninmantsu: “Noqaqa allillata rurarmi kawä.
Shonqüpis manami llutankunata yarpantsu”.†
10 Pësuwan y tupuwan engañaptinqa Tayta Dios pasaypami ajanan.†
11 Alli chölu kanqanta reqintsik yanapakuq y respitösu kaptinmi.
12 Ñawitapis rikananpämi y rinritapis wiyananpämi Tayta Dios kamashqa.
13 Paqaspis junaqpis punukurqa imaynaqmi tikranki.
Arukuptikiqa mikuynikipis manami pishinqatsu.
14 Rantinanpä kaykarmi wallka chaninllacho munar: “Kayqa manami allitsu” nin.
Wallka chaninllacho rantiskirnami kushikun.
15 Tantiyakuq runa parlanqanqa atska qoripitapis y atska alhäjakunapitapis mas allimi kaykan.
16 Jäpa runata garantizaqtaqa latsapantapis prenda tsarikuy jaqanta päganqanyaq.†
17 Llullapaypa sakyaq runaqa tsay höra kushikurpis warayninkunaqa problëmachömi kanqa.
18 Yätsikuqkuna tantiyatsiptinmi chaskikuqkuna imatapis shumaq ruran.
Guërrachöpis vinciyan shumaq yarpachakuskir pelyarrämi.
19 Tullu shimiqa rasmi pitapis willaskin.
Tsaynö kaqkunawanqa ama takukäyaytsu.
20 Taytanta y mamanta maldicionaq runaqa pasaypa ñakarmi wanunqa.†
21 Mana ñakayllapa imaykayuq tikranqanqa rasmi ushakanqa.
Ushakäpakuskirqa llakishqami purinqa.
22 Venganzata ruranaykipä ama yarpaytsu.
Tsaypa trokinqa Tayta Diosman yärakuy.
Paymi imapitapis tsapäshunki.†
23 Pësunwan y tupuwan engañaptinqa Tayta Dios pasaypami ajanan.
24 Runa imanö kawananpäpis Tayta Diosmi kamakätsin.†
Pipis manami musyantsu waray warantin imanö kawananpä kanqantapis.†
25 Tayta Diosta awnirkur paqtä cumplinkimantsu.
Mana cumpliptikiqa juzgashunkimi.
26 Yachaq reyqa mana alli runakunata qarqunmi.
Paykunataqa chipyaqmi ushakätsin.
27 Runapa shonqun allita o mana allita yarpanqantapis Tayta Diosmi musyan.
28 Rey kuyapäkuq y rasun kaqllata parlaq kaptinqa pipis trukatsiyta manami munantsu.
29 Chölukunaqa kallpasapa kayanqanpitami kushikuyan.
Awkinkunaqa yachaq kayanqanpitami kushikuyan.
30 Jutsa ruraq runaqa castigaptinrämi jutsa rurayta kacharin.
Castigaptinrämi llutanta ruraykanqanta tantiyakun.