19
Tumpakuq y mana tantiyakuq runapitaqa mas allimi kanman muchuqlla karpis respitashqa kanqan.†2 Mana yarpachakuypa imatapis ruraptikiqa mana allimi kanqa.
Imatapis raslla rurarqa mana allitami ruraykanki.
3 Mana tantiyakuq runaqa imatapis llutantami ruran.
Nirkurmi Tayta Diosta jitapan.
4 Imaykayuq runaqa atska amïgunyuqmi kaykan.
Muchuq runapitaqa amïgunpis witikunmi.
5 Rantiy testïguqa castigashqami kanqa.
Llullakuq runaqa castïgupita manami qeshpinqatsu.†
6 Yanapakuq runataqa pïmaypis mañakunmi.
Paypa amïgun kaytaqa pïmaypis munanmi.
7 Muchuq runata castankunapis ajayaykaptinqa rasuntachi amïgunkunapis paypita witikuyan.
Parlakunallanpäpis manami pïninpis kantsu.
8 Yachakunqannö kawaq runaqa kushishqami kawan.
Tsay runapäqa bendicionmi kanqa.
9 Rantiy testïguqa castigashqami kanqa.
Llullakuq runataqa wanuymi shuyaykan.†
10 Mana tantiyakuq runa imaykayuq rikakunqanqa penqakuypämi kaykan.
Tsaynöpis penqakuypämi kaykan wätaykuna mayor runakunapa mandaqnin kaptin.
11 Tantiyakuq runaqa imapitapis manami ajanantsu.
Achäquita ashipaptinpis wiyaräkunmi.
12 León qayaranqan mantsariypä kanqannömi rey ajananqanpis mantsariypä kaykan.
Kuyakuyninmi itsanqa qewakuna janancho shullya kanqannö kushikuypä kaykan.
13 Mana tantiyakuq chöluqa taytantami llakikatsin.
Runanta ajanätsiq warmiqa imayka jutuq wayinömi kaykan.†
14 Runaqa taytanpitami wayita y ima herenciatapis chaskin.
Tsaynö kaptinpis alli yarpayyuq warmitaqa Tayta Diospitarämi tarin.
15 Qela runaqa mana ajayaypami punukun.
Tsaynö karqa muchuyllachömi kawanqa.
16 Tayta Diospa mandamientunkunata cäsukuq runaqa allimi kawanqa.
Tsaynö kaptinpis Tayta Dios ninqanta mana cäsukuq runami itsanqa wanunqa.
17 Muchuqkunata yanaparqa Tayta Diosta mañaqnömi kaykan.
Tsaynö yanapanqanpitami Tayta Dios kutitsinqa.
18 Wamra kanqanyaqlla tsurikita shumaq corriginki.
Mana corriginqaykipita llutanta rurar wanuptinqa qammi jutsayuq kanki.
19 Alläpa ajanaq runaqa castigashqami kanqa.
Mana castigayaptinqa imayka mana allikunatami ruranqa.
20 Yätsishunqaykita wiyakuy.
Corrigishuptiki chaskikuy.
Chaskikurqa yachaqmi kanki.
21 Alli kawayta munarmi runaqa imaykata yarpachakun.
Tsaynö kaptinpis Tayta Dios kamakätsiptinrämi yarpanqannö kamakan.†
22 Awninqanta cumpliq runamanqa pipis yärakunmi.
Mas allimi kanman llullakunanpa trokin muchuqlla karpis rasun kaqllata parlanqan.
23 Tayta Diospita mantsapakuq runaqa allimi kawan.
Tsay runa añaw kawarmi ima mana allimanpis jatikantsu.
24 Qela runaqa plätun churapakushqa kaykarpis manami mikunallanpäpis chaqarkuntsu.†
25 Mana tantiyakuq runaqa shimisapa runata castigaqta rikarrämi tantiyakun.
Yachaq runami itsanqa yätsiyanqallanwan tantiyakun.†
26 Taytanta suwapaq runapaqa manami penqakuyninpis kantsu.
Mamanta wayinpita qarquq runapaqa manami yawarninpis kantsu.
27 Hïju, yachatsishunqaykita mana chaskikurqa mana tantiyakuq runami kaykanki.
28 Llullakuq testïguqa jueztapis mana mantsapaypami llullapan.
Mana alli runaqa shimin tarinqantami imaykatapis parlan.†
29 Shimisapa runataqa wiruypami castigayan.
Mana wiyakuq runataqa asutaypami castigayan.