18
Kikillanpä imatapis munaq runaqa wakinpä manami yarpachakuntsu.Pï yätsiptinpis manami chaskikuntsu.
2 Mana tantiyakuq runaqa yachakuytapis manami munantsu.
Tsaypa trokinqa ichik yachanqallantami alabakun.
3 Mana alli runaqa penqakuychömi kanqa.
Runa tukuqqa manakaqman churashqami kanqa.
4 Yachaq runa parlanqanqa mana tsakiq pukyunömi kaykan.
Tsaymi yachatsinqanpis wiyakuy munay kaykan.
5 Manami allitsu kaykan jutsayuq runapa janan shärir jutsaynaq runata tumpanqan.
6 Mana tantiyakuq runaqa llutallami piwanpis rimanakun.
Kikinpa shiminpitami maqaytukunpis.
7 Mana tantiyakuq runataqa shimillanmi jitarpun.
Paytaqa shimillanpitami wanutsiyanqapis.
8 Tullu shimi parlanqanqa imayka mishkinörämi runata mishkikatsin.
Tsaymi wiyaqkunapa shonqunyaq chaykun.†
9 Qela runawan chiki runaqa tsay wawqinöllami kayan.
10 Tayta Diosqa alli sharkatsishqa törrinömi kaykan.
Tsaymi jutsaynaq runakunaqa payman amparakuyan.
11 Imaykayuq runaqa imaykanman yärakurmi murallashqa markanö kanqanta yarpan.
Tsaymi imapis mana päsananpä kanqanta yarpan.
12 Runa tukuq runaqa pasaypami ñakanqa.
Mana runa tukuqtami itsanqa pïmaypis respitan.
13 Parlayta manarä ushaptin contestaq runaqa mana tantiyakuq karmi penqakuypä kaykan.
14 Qeshyarpis kushikurqa alliyanmi.
Tsaynö kaptinpis pasaypa llakikurqa ¿imanörä alliyanmanpis?†
15 Yachaq runaqa masmi yachaq kayta munan.
Tantiyakuq runaqa masmi yachakun.
16 Imallanwanpis chaptinqa pïmaypis kushishqami chaskin.
Qarananpä imallatapis aparqa munayyuq runamanpis yaykuskinmi.
17 Puntata demandakuq chaq kaqmi autoridäta criyiratsin.
Demandanqan runa chaykur declaraptinrämi musyakan mayqan jutsayuq kanqanpis.
18 Suertita jitarqa demandukuna aja arreglay kaptinpis jukllami arreglayan.
Munayyuq runakunapis suerti yarqamunqantami rurayan.
19 Markapa murällan aja juchutsiy kanqanpitapis mas ajami wawqinwan rimanakushqa runata amistatsiy.
Tsay runaqa imayka barritawan trancashqa punkunömi kaykan.
20 Runaqa shiminpitami chikishqa o kuyashqapis kaykan.†
21 Wanuytapis kawaytapis shiminpitami tarin.
Alläpa parlaq runaqa chikishqami kanqa.
22 Warmiyuq runaqa kushishqami kawan.
Alli warmita tarinqanqa Tayta Diospa bendicionninmi kaykan.
23 Muchuq runaqa imallapäpis rugakunmi.
Imaykayuq runami itsanqa pitapis ollqutupan.
24 Mana alli runaqa amïguntapis llutan ruraymanmi apan.
Alli runami itsanqa wawqintanö amïguntapis yanapan.