17
Alli allillata mikurpis chikinakur kawananpa trokinqa mas alli kaykan chukrush tantata mikullarpis kuyanakur kawanqanmi.2 Tantiyakuq wätaynintami patronnin churan mana wiyakuq tsurinta rikananpä.
Tsay wätayninmi patronninpa tsurinkunawan herenciata rakipänakuyanqa.
3 Rasunpaypa qori kanqanta y qellay kanqanta musyananpä ninawanmi tsullutsin.
Tsaynöllami runapa yarpaynin alli kanqanta o mana alli kanqantapis musyananpä Tayta Dios pruëbatarä ruran.†
4 Mana alli runaqa mana alli mayin yachatsinqantami chaskipan.
Llulla runapis llulla mayin ninqantami chaskipan.
5 Muchuqkunata manakaqman churarqa kamakuq Tayta Diostami manakaqman churan.
Runa mayinta desgracia päsaptin kushiparqa castigashqami kanqa.
6 Willkankunaqa imayka corönanömi awilunkunapä kaykan.
Maman taytan kawaptinmi wamrankunapis kushishqa kawayan.
7 Mana tantiyakuq runa yachaq tukur parlaptin penqakuypä kanqannömi autoridä llullakuptin pasaypa penqakuypä kaykan.
8 Qarayta apaqkunaqa pïmaytapis awnitsiyanmi.
Tsaymi llapan imayka yarpäyanqantapis tariyan.
9 Perdonakuq karqa amïgutapis tarinmi.
Mana perdonakuq karmi itsanqa amïguntapis oqran.
10 Tantiyakuq karqa yachatsiptin wiyakunmi.
Mana tantiyakuq karmi itsanqa atska kuti asutaptinpis cäsukuntsu.
11 Mana alli runaqa piwanpis pelyallatami ashin.
Tsaynö kaykaptinmi kallpasapa runa yuriskir kikintapis maqakachaskin.
12 Mana tantiyakuq ajanashqa runaqa wawan oqrashqa ösupitapis mas mantsaypämi kaykan.
13 Yanapaykaptin mana alliwan kutitsiptinqa castankunachöpis desgraciallami kanqa.
14 Pelya ashiq runaqa imayka juchu aywaqnömi kaykan.
Wajupaptinpis witikunqanmi mas alli kaykan.
15 Jutsa ruraqta castigananpa trokin jutsaynaqta castigaptinmi Tayta Dios ajanan.†
16 ¿Imapätä välin mana tantiyakuq runa atska qellayyuq kanqanpis?
Atska qellayyuq karpis yachaytaqa manami rantiyta kamäpakuntsu.
17 Alli amïguqa imaypis amïgunta manami jaqirintsu.
Ima ñakaycho kaptinpis wawqintanömi yanapan.
18 Mana tantiyakuq runaqa pipapis garantianmi yaykun.
Garantizanqan runa mana pägakuptinqa kikinmi pägakunqa.
19 Runa mayinta wajupaq runaqa pelyallatami ashin.
Shimisapa runaqa shimillanpitami maqaytukun.
20 Llutanta rurananpä yarpachakuq runaqa manami imaypis alli kawayta tarintsu.
Llullakuqtaqa imaypis desgraciami päsan.
21 Tsurin mana tantiyakuq kaptinmi taytan llakikun.
Llutan ruraq kaptinmi ajanan.
22 Kushishqa kawaq runaqa manami qeshyantsu.
Llakishqa kawaq runami itsanqa qeshyallar kawan.†
23 Mana alli runaqa pakayllapami chaskipakun.
Nirkurmi jutsa ruraqpa janan shärin.†
24 Tantiyakuq runaqa yachaq kananpämi yarpachakun.
Mana tantiyakuq runami itsanqa yachakunanpä yarpachakuntsu.
25 Mana tantiyakuq wamraqa taytantapis ajanätsinmi y mamantapis llakikatsinmi.
26 Manami allitsu jutsaynaq runata castiganqan.
Ni manami allitsu kaykan respitashqa runata asutanqan.
27 Shumaq tantiyakuq runaqa manami alläpa parlakuntsu.
Yachaq runaqa ima kaptinpis upällakunmi.
28 Mana yachaq runapis upällakuptin y pacienciakuptinqa yachaq kanqantami yarpäyan.