16
Runaqa imata rurananpäpis yarpachakunmi.Mayjina yarpachakuptinpis Tayta Dios kamakätsiptinrämi imapis kamakan.†
2 Runaqa imata rurarpis allita ruraykanqantami yarpan.
Tsaynö kaptinpis Tayta Diosmi musyaykan rasunpaypa alli yarpaywan o mana alli yarpaywan ruranqantapis.†
3 Ima ruraytapis yarparqa yanapashunaykipä Tayta Diosta mañakuy.
Tsaynö mañakuptikiqa yarpanqaykikuna kamakanqami.†
4 Tayta Diosqa yarpanqannö kananpämi llapantapis kamashqa.
Mana alli runatapis kamashqa juzganan junaqcho castigananpämi.
5 Runa tukuqkunaqa Tayta Diosta pasaypami ajanätsiyan.
Paykunataqa imay junaq karpis castiganqami.
6 Rasunpaypa kuyakuq karmi jutsata ruraptinpis perdonan.
Tayta Diospita mantsapakurmi jutsa ruraypitapis witikun.
7 Tayta Diosqa munanqannö kawaqkunatami chikiqninkunawanpis perdonanakur alli kawayänanpä yanapan.
8 Suwakuypa imaykayuq tikrayanqanpa trokinqa mas alli kaykan arukur ichikllatapis tarinqanmi.
9 Runa imanö kawananpä yarpachakuptinpis Tayta Dios munaptinrämi yarpanqannö kamakan.†
10 Reytaqa alli parlananpä Tayta Diosmi tantiyatsin.
Pitapis juzgarqa munanqannöllami Tayta Dios juzgan.
11 Balanzawan o tupuwan karpis complëtuta rantikunantami Tayta Dios munan.
Balanzawan o tupuwan engañaqkunataqa paymi juzganqa.
12 Pitapis mana jananpaypa juzgaptinrämi reypa favornin runakuna kayan.
Tsaymi reyqa pipis jutsata ruraptin mana kuyapaypa juzgan.
13 Pipis rasun kaqllata parlaptinqa reymi kushikun.
Mana llullakuypa parlaq runataqa kuyanmi.
14 Rey ajanaptinqa runakuna yarpäyan pitapis wanutsinanpä kanqantami.
Tsaynö kaptinpis yachaq runakunaqa imaykanöpapis kushikatsiyanmi.
15 Rey kushishqa kaptinqa yanapananpä kanqanta yarparmi pipis kushikun.
Yanapanqanqa murukuy tiempu tamyanömi kaykan.
16 Tantiyakuq kaymi qoripitapis mas alli kaykan.
Yachaq kaymi qellaypitapis mas alli kaykan.
17 Alli runaqa jutsa ruraypita witikunmi.
Jutsa rurayta kachariqkunaqa wanuypitami salvakun.
18 Runa tukuqtaqa desgraciami päsanqa.
Chölu tukuqkunaqa fracasanqami.
19 Imaykayuq kayta munar runa tukuqkunawan takukanqan manami allitsu.
Tsaypa trokinqa mas allimi kaykan imaynaq kaqkunawan llampu shonqu kawanqan.
20 Shumaq tantiyakuykur imaykantapis alli rikaptinqa aptarkunanpä kanqami.
Tayta Diosman yärakurqa kushishqami kawanqa.
21 Yachaq runataqa yachaq kanqantami niyan.
Alli shimillanpa parlaq runaqa pitapis shumaqmi yachatsin.
22 Shumaq tantiyakuq runaqa allimi kawan.
Mana tantiyakuq runataqa manakaqllapämi pipis tantiyatsin.
23 Yachaq runaqa shumaq tantiyakuykurmi parlan.
Pay parlanqantaqa runakuna chaskikuyanmi.
24 Pipis alli shimillanpa parlanqanqa abëjapa mishkinnömi kaykan.
Tsaynö parlarmi pïmaytapis shakyätsir kushikatsin.
25 Wakin runakunaqa llutanta rurarpis allita ruraykäyanqantami yarpäyan.
Tsaynölla kawarqa wanurmi ushakäyanqa.†
26 Runaqa mikunanpä imanpis mana kaptinmi ima aruymanpis yaykun.
Muchuycho kawayta mana munarmi arukun.
27 Mana alli runaqa llutanta rurananpämi yarpachakun.
Imata parlanqanpis ninanömi kaykan.†
28 Mana alli runaqa pïmaytapis rimanakatsirmi purin.
Tullu shimikunaqa alli kawakuqkunatapis chikinakatsinmi.
29 Mana alli runaqa amïguntapis llullapanmi.
Alli kawaptinpis llutan ruraymanmi jitarpun.
30 Llutan rurayta yarpaq runaqa ñawillanwanmi qemtsipaskin.
Jutsata ruraskirnami upällakun.
31 Allillata rurar kawaq runakunaqa soquyanqanyaqmi kawayan.
Tsaymi soquyashqa runaqa respitaypä kaykan.
32 Alli chölu kanqanpitapis mana ajanaq kanqanmi mas alli kaykan.
Markata dominananpa trokinqa kikinpa geniunta dominanqanmi mas alli kaykan.
33 Imata rurananpäpis wakin runaqa suertitarämi jitan.
Tsaynö kaptinpis Tayta Dios munaptinrämi imapis kamakan.