15
Pasaypa ajashqa kaptinpis alli shimillanpa parlaparqa ajanayninta qallqütsinmi.Shimi shimi qayapänakurmi itsanqa pasaypa ajätsinakuyan.
2 Yachaq runa parlaptinqa wiyaqkuna shumaqmi yachakuyan.
Mana yachaq runami itsanqa shimin tarinqanta imatapis llutalla parlan.
3 Tayta Dios maytsaychöpis kaykarmi alli ruraqta y mana alli ruraqtapis rikaykan.
4 Alli shimillanpa parlaq runaqa runa mayinta kushikatsinmi.
Llutan parlaq runami itsanqa pïmaytapis qallayätsin.
5 Mana tantiyakuq chöluqa taytan yätsinqanta manami wiyakuntsu.
Tantiyakuq chölumi itsanqa yätsinqanta chaskikun.
6 Alli runapa wayinchöqa imaykanpis ujükunmia.
Mana alli runapami itsanqa ima tarinqanpis ajanänallanpä.
7 Yachaq runaqa pïmaytapis alli kaqkunallatami yachatsin.
Mana yachaq runami itsanqa alli kaqkunata yachatsinanpä yarpayllapis yarpantsu.
8 Mana alli runapa ofrendantaqa Tayta Dios manami chaskintsu.†
Alli runa mañakunqantami itsanqa kushishqa chaskin.
9 Mana alli runataqa Tayta Dios manami rikaytapis munantsu.
Pay munanqannö kawaq runatami itsanqa kuyan.
10 Llutan ruraqqa castigashqami kanqa.
Corrigiptinpis mana wiyakurqa chipyaqmi ushakanqa.
11 Tayta Diosqa musyanmi wanuqpa alman maycho kanqantapis.
Tsaytsurä musyanmantsu runakunapa shonqun imata yarpanqantapis.
12 Respëtuynaq runaqa pï corrigiptinpis ajananmi.
Yachaq runawanqa manami takukaytapis munantsu.
13 Shonqun kushishqa kaptinqa qaqllanpis atsikyarkunmi.
Llakishqa kaptinmi itsanqa qaqllanpis jukläyashqa.
14 Tantiyakuq runaqa imaykanöpapis mas yachaq kaytami munan.
Mana tantiyakuq runami itsanqa manakaqkunata parlanqanpita kushikun.
15 Qallayashqa runapäqa mayqan junaqpis manami allitsu.
Kushishqa kawaq runapämi itsanqa llapan junaqpis alli kaykan.
16 Imaykayuq kananpä yarpachakunanpa trokinqa mas allimi kanman imaynaq karpis Tayta Diospita mantsapakur kawanqan.†
17 Wera wäkata mikurpis chikinakur kawanqanpitaqa mas alli kaykan santu calduta upullarpis kuyanakur kawanqanmi.
18 Ras ajanaq runaqa piwanpis llutallami tinkun.
Mana ajanaq runami itsanqa piwanpis rimanakuntsu.
19 Qela runapäqa ima ruraypis kasha näninömi kaykan.
Arukuq runapämi itsanqa ima ruraypis pitsashqa näninö kaykan.
20 Wamran yachaq kaptinqa mamanwan taytan kushikuyanmi.
Mana yachaq kaptinmi itsanqa penqakuyan.†
21 Mana tantiyakuq runaqa llutanta rurarpis kushikunmi.
Tantiyakuq runami itsanqa llutanta rurarpis yarpachakur corrigikun.
22 Yätsikuqkunata mana tapukuypa imallatapis ruraptinqa manami yarpanqannötsu kanqa.
Yätsikuqkunata tapukuskir ruraptinmi itsanqa llapanpis alli kanqa.
23 Tapukunqanta shumaq tantiyatsiptinqa kushikunmi.
Tiempullancho yätsinqanqa allimi kaykan.
24 Tantiyakuq runaqa alli kawaytami tarin.
Tsaynöpami wanuypitapis salvakun.
25 Runa tukuqkunataqa wayincho taqkunatawanmi Tayta Dios ushakätsin.
Viüdakunapatami itsanqa chakrankunatapis rikan.
26 Mana alli runapa yarpayninpitami Tayta Dios ajanan.
Alli runa parlanqankunapitami itsanqa kushikun.
27 Ayrajashqa runaqa chaskipakurmi tsurinkunatapis muchuyman churan.
Mana chaskipakuq runami itsanqa añaw kawan.
28 Alli runaqa imata ninanpäpis shumaqrämi yarpachakun.
Mana alli runami itsanqa imatapis shiminman chanqanta parlan.†
29 Mana alli runa mañakunqantaqa Tayta Dios manami cäsuntsu.
Alli runa mañakunqantami itsanqa wiyan.
30 Kushishqa kaykaqta rikarqa pipis kushikunmi.
Alli noticiata wiyaptinmi shonqunpis atsikyaskin.
31 Yätsiqnin yachatsinqanta wiyakuq runaqa yachaqmi kanqa.
32 Corriginqanta mana chaskikuq runaqa mana alli kawaymanmi chanqa.
Corriginqanta chaskikuq runami itsanqa mas yachaq kanqa.
33 Tayta Diospita mantsapakuq runaqa tantiyakuqmi kaykan.
Respitashqa kayta munarqa qollmi shonqu katsun.