12
Tantiyakuq runaqa pipis corrigiptin chaskikunmi.Mana tantiyakuq runami itsanqa corrigiptinpis chaskikuntsu.
2 Alli runataqa Tayta Dios yanapanmi.
Mana alli runatami itsanqa castigan.
3 Mana alli runataqa pïmaypis chikinmi.
Alli runatami itsanqa pïmaypis kuyan.
4 Alli warmiqa runanta kushikatsinmi.
Respëtuynaq warmimi itsanqa runanta qallayätsin.
5 Alli runaqa allita rurananpämi yarpachakun.
Mana alli runami itsanqa pitapis engañananpä yarpachakun.
6 Mana alli runa parlanqanqa trampanömi kaykan.
Alli runa yätsinqanmi itsanqa alli kawananpä kaykan.
7 Mana alli runakunaqa mana allita ruraykäyanqallanchömi ushakäyan.
Alli runakunami itsanqa kikinpis y wayincho taqkunapis atska wata kawayanqa.
8 Yachaq runataqa pïmaypis respitanmi.
Mana tantiyakuq runatami itsanqa pïmaypis mana alli rikan.
9 Imaynaq kaykar runa tukunqanpitaqa mas alli kaykan imaynaq karpis amïguyuq kaymi.
10 Alli runaqa uywantapis kuyapanmi.
Mana alli runami itsanqa kuyapaytapis yachantsu.
11 Arukuq runapaqa mikuyninpis ujükunqamia.
Qela runakunawan takukaqpaqa yarpayninpis manami kantsu.
12 Mana alli runaqa jukpa kaqtami munapan.
Alli runami itsanqa kikin tarinqanwan kushishqa kawakun.
13 Mana alli runaqa kikinpa shiminpitami imaykamanpis ishkin.
Alli runami itsanqa imaman charpis allilla yarqun.
14 Pï runapis parlanqanman tupumi alli rikashqa o mana alli rikashqapis kanqa.
Tsaynöllami allita ruranqanman tupu alli rikashqa o mana alli rikashqapis kanqa.†
15 Mana yachaq runaqa llutanta rurarpis alli kanqantami yarpan.
Yachaq runami itsanqa yätsiyanqanta chaskikun.
16 Mana tantiyakuq runaqa imallapitapis rasmi ajanan.
Tantiyakuq runami itsanqa ashlliyaptinpis perdonan.
17 Alli testïguqa rasun kaqllatami parlan.
Rantiy testïgumi itsanqa llullata parlan.
18 Mana yachaq runakuna parlanqanqa cuchillunömi shonqunman chaykun.
Yachaq runa parlanqanmi itsanqa jampinö kaykan.
19 Rasun kaqta parlaq runaqa atska watami kawan.
Llullakuq runami itsanqa manaräpis unayta ushakan.
20 Mana alli runaqa pitapis llullapänallanpämi yarpachakun.
Piwanpis alli kawaq runa yätsiptinqa pïmaypis kushikunmi.
21 Alli runataqa manami imapis päsantsu.
Mana alli runatami itsanqa imayka desgraciapis päsan.
22 Llullakuq runataqa Tayta Dios rikaytapis manami munantsu.
Mana llullakuq runatami itsanqa kuyan.
23 Tantiyakuq runaqa yachaq kanqanpita manami alabakuntsu.
Mana tantiyakuq runami itsanqa llutanta rurarpis alabakun.
24 Arukuq runaqa mandaqmi tikran.
Qela runami itsanqa wätay rikakun.
25 Pasaypa llakikurqa aywapakashqami purin.
Pillapis alli shiminpa parlapaptinqa kushikunmi.
26 Alli runaqa runa mayinta shumaqmi tantiyatsin.
Mana alli runami itsanqa llutankunaman pushan.
27 Qela runaqa manami imatapis tarintsu.
Arukuq runami itsanqa imaykayuq tikran.
28 Alli runaqa imaypis allimi kawan.
Juiciuynaq runami itsanqa wanuytapis kikin ashin.