13
Yachaq wamraqa taytan corriginqanta chaskikunmi.Awilan wätashqa wamraqa manami wiyakuntsu.
2 Shiminpitami alli rikashqa o mana alli rikashqapis kanqa.
Llutankunata parlaq runaqa chikishqami kanqa.†
3 Allikunallata parlaq runaqa wanuypitami salvakun.
Shimin tarinqanta parlaq runami itsanqa ushakan.†
4 Qela runaqa mayjina munarpis manami imatapis tarintsu.
Aruq runami itsanqa munanqanta imatapis tarin.
5 Alli runaqa llullakuyta manami munantsu.
Mana alli runaqa penqakuypämi imatapis ruran.
6 Alli runaqa allita ruranqanpitami shumaq kawanqa.
Mana alli runami itsanqa jutsata ruranqanpita ushakanqa.
7 Wakin runakunaqa imanpis mana kaykaptinmi imaykayuq tukuyan.
Wakin runakunanami imaykayuq kaykarpis imaynaq tukuyan.
8 Imaykayuq runaqa qellayninwanmi wanuypitapis salvakun.
Imaynaq runataqa manami pipis jurapaykantsu.
9 Alli kawaq runaqa shumaq atsikyaq chiwchinömi kaykan.
Mana alli runami itsanqa aktsi upiqnö illakanqa.
10 Runa tukuq runaqa pitapis ajanätsinmi.
Yätsinqanta chaskikuq runaqa tantiyakuqmi kaykan.†
11 Mana ñakayllapa tarinqan qellayqa imayka yakunömi ushakan.
Wallka wallkalla qellayta qoriq runami itsanqa imaykayuq tikran.
12 Yarpanqannö mana kamakaptinqa pipis pasaypami llakikun.
Yarpanqannö kamakaptinmi itsanqa kushikun.
13 Mandaqnin ninqanta mana cäsukurqa castigashqami kanqa.
Mandanqanta cäsukurmi itsanqa premiuta chaskinqa.
14 Yachaq runa yätsinqanta chaskikurqa alli kawaytami tarin.
Tsaynöpami wanuypitapis qeshpin.†
15 Alli yarpayyuq runataqa pïmaypis respitanmi.
Mana cäsukuq runami itsanqa desgraciaman chan.
16 Tantiyakuq runaqa shumaq yarpachakuskirmi imatapis ruran.
Mana tantiyakuq runami itsanqa llutanta ruraykarpis allish tukun.
17 Mana yärakuypä runaqa mandaqnintami ajanätsin.
Yärakuypä runami itsanqa mandaqninta kushikatsin.
18 Yätsinqanta mana chaskikuq runaqa penqakuypämi muchuyman chanqa.
Yachatsinqanta chaskikuq runami itsanqa respitashqa kanqa.
19 Yarpanqannölla imapis kamakaptinqa pipis kushikunmi.
Mana tantiyakuq runaqa llutan rurayta manami kachariyta munantsu.
20 Yachaq runawan purirqa yachaqmi rikakun.
Mana yachaq runawan purirqa mana allikunatami yachakun.
21 Mana alli runaqa mana allimi kawan.
Alli runami itsanqa añaw kawan.
22 Alli runapa herencianqa willkankunapäpis kanqami.
Mana alli runapa herencianmi itsanqa alli runakunapa makinman chanqa.
23 Muchuq runapa chakrancho mikuy alli wayuptinpis mana alli runami ushapan.
24 Wamranta mana corrigirqa manami rasunpaypatsu kuyan.
Rasunpaypa kuyarqa jukllami corrigin.
25 Alli runapa wayinchöqa mikuynin ujükunmia.
Mana alli runapa wayinchömi itsanqa wayralla tumaykan.