11
Pësun pishiykaqta rantikuptinqa Tayta Dios ajananmi.Pësun complëtuta rantikuptinmi itsanqa kushikun.†
2 Runa tukuqkunaqa mana alli rikashqami kaykan.
Qollmi shonqu runaqa shumaqmi tantiyakun.†
3 Alli runaqa Diosta cäsukurmi alli kawan.
Mana alli runami itsanqa jutsata ruranqanpita ushakan.
4 Tayta Dios castiganqan junaqqa imaykayuq kanqanpis manami välinqatsu.
Alli ruraq runami itsanqa salvakunqa.†
5 Alli runaqa alläpa manami ñakanqatsu.
Mana alli runami itsanqa llutanta ruranqanpita ñakanqa.
6 Alli runapaqa manami pipis contran shärintsu.
Ayrajashqa mana alli runapami itsanqa pïmaypis contran shärin.
7 Mana alli runaqa imaykayuqpis kananpä yarpachakuykanqallanchömi ushakanqa.
8 Alli runataqa ima ñakaypitapis Tayta Dios salvanmi.
Mana alli runatami itsanqa ñakananpä kachariykun.
9 Mana alli runaqa ayaq shiminpa parlarmi runa mayinta llakikatsin.
Alli runami itsanqa tantiyakuq kar alli kawananpä yätsin.
10 Alli runapa imanpis kaptinqa marka mayinkuna kushikuyanmi.
Tsaynöllami kushikuyan mana alli runa wanuptinpis.
11 Alli runa bendicionta qoptinqa marka mayinkuna allimi kawayan.
Mana alli runa manakaqkunata willapäkuptinmi itsanqa rimanakuykällar qarqunakuyan.
12 Mana tantiyakuq runaqa runa mayintapis penqakuymanmi churan.
Tantiyakuq runami itsanqa upälla kakun.
13 Tullu shimiqa imata musyanqantapis willakurmi purin.
Yärakuypä runami itsanqa imata willaptinpis upällakun.
14 Juk nacioncho mandaq mana alli mandaptinqa pasaypami ñakayan.
Yätsikuqkuna atskaq kayaptinqa mandaqpis allimi mandan.†
15 Mana reqishqa runata garantizarqa jaqami rikakun.
Pitapis mana garantizarqa añawmi kawakun.
16 Alli shonquyuq warmitaqa pïmaypis allimi rikan.
Arukuq runaqa imaykayuqmi tikran.
17 Kuyakuq runaqa kikinpis kushishqami kawan.
Mana kuyakuq runami itsanqa llakishqalla kawan.
18 Mana alli runa gänanqanqa manakaqllachömi ushakan.
Alli runa gänanqanmi itsanqa ushakantsu.
19 Alli runaqa añawmi kawan.
Mana allita ruraq runami itsanqa manaräpis unayta ushakan.
20 Mana alli yarpayyuq runataqa rikaytapis Tayta Dios manami munantsu.
Alli ruraq runata rikarmi itsanqa kushikun.
21 Mana alli runaqa imay karpis castigashqami kanqa.
Alli ruraq runami itsanqa salvashqa kanqa.
22 Mana tantiyakuq warmiqa kuyayllapä karpis
kuchipa senqancho qori sortïja jatiraykaqnömi kaykan.
23 Alli runa yarpanqanqa llapanpis allimi kaykan.
Mana alli runa yarpanqanmi itsanqa pïmaytapis ajanätsin.
24 Runa mayinta imallawanpis yanapaqkunaqa mastami tariyan.
Mana yanapakuqkunami itsanqa muchuyman chäyan.
25 Runa mayinta imallawanpis yanapaqkunaqa bendiciontami chaskiyan.
Yanapakuqkunaqa yanapashqami kayanqa.
26 Trïgun kaykaptin rantikuyta mana munaptinqa maldicionayanmi.
Rantikuptinmi itsanqa agradëcikuyan.
27 Alli runataqa pipis respitanmi.
Mana alli runatami itsanqa desgracia päsanqa.
28 Imaykanman yärakuq runaqa tsakishqa rapranömi ushakanqa.
Alli runami itsanqa jacha sheqlliqnö alli kawanqa.†
29 Mana yachaq runa wayincho taqkunata inkaraptinmi qallayar aywakuyanqa.
Tsaymi kikillan quëdaskir yachaq runapa wätayninna rikakunqa.
30 Alli runaqa alli wayuq plantanömi kaykan.
Paytaqa pïmaypis yachananmi.
31 Tayta Diosta cäsukuq runaqa allita ruranqanpitami kay patsacho premiuta chaskin.
Tayta Diosta mana cäsukuq runami itsanqa jutsata ruranqanpita castigashqa kanqa.