Salomón parlanqan yachatsikuykuna
10
Kaychömi qellqaraykan Salomón parlanqan yachatsikuykuna.Tsurin yachaq kaptinqa mamanpis taytanpis kushikuyanmi.
Mana yachaq kaptinmi itsanqa llakikuyan.†
2 Suwakuypa imaykayuq tikraqkunataqa manaräpis provichaptinmi wanutsiyanqa.
Arukur shumaq kawakuqkunatami itsanqa pipis wanutsinqatsu.†
3 Alli runataqa muchuycho mana kananpämi Tayta Dios yanapan.
Mana alli runakunatami itsanqa munanqanta tarinanpäpis yanapantsu.†
4 Qela runaqa muchuqmi rikakun.
Arukuq runami itsanqa imaykayuq tikran.
5 Usya witsan mikuyninta churakuq runaqa tantiyakuqmi kaykan.
Cosëcha witsan punukuq runami itsanqa penqakuypä kaykan.
6 Alli runaqa bendiciontami chaskin.
Mana alli runami itsanqa alli shimillanpa parlarpis shonqunchöqa mana allita rurananpä yarpaykan.
7 Alli runapäqa pipis yarpaskinmi.
Mana alli runapämi itsanqa ni pipis yarpantsu.
8 Yachaq runaqa mandaqninta cäsukunmi.
Manakaqkunata parlaq runami itsanqa chikishqa kanqa.
9 Allillata ruraq runaqa añawmi kawan.
Mana allita ruraq runami itsanqa illaqpita ushakan.
10 Llutanta rurananpä qemtsipaq runaqa llakikuymanmi chanqa.
Llutanta parlaq runaqa chikishqami kanqa.
11 Alli runa yätsiptinqa pipis kushishqami kawan.
Mana alli runa willapaptinmi itsanqa pipis rimanakun.
12 Chiki runaqa pïmaytapis maqanakatsinmi.
Kuyakuq runami itsanqa imata rurayaptinpis perdonan.†
13 Yachaq runaqa imatapis allimi tantiyatsikun.
Mana tantiyakuq runaqa maypis wiruy munaymi kaykan.
14 Yachaq runaqa manami imatapis llutallaqa parlantsu.
Mana yachaq runami itsanqa llutalla parlar pïmaytapis ajanätsin.
15 Imaykayuq runapaqa washäkunanpä imaykan kanmi.
Muchuq runapami itsanqa washäkunanpä ni imanpis kantsu.
16 Alli runaqa pïmaywanpis allimi kawan.
Mana alli runami itsanqa jutsa rurayllacho kawan.
17 Yachatsinqanta cäsukuq runaqa alli kawaytami tarin.
Yachatsinqanta mana wiyakuq runami itsanqa mana alli kawan.
18 Chikiykarpis allitupayllapa parlaparqa llullapaykanmi.
Mana tantiyakuq runaqa cuentullawanmi willapäkur purin.
19 Alläpa parlaq runaqa manakaqtapis parlanmi.
Shumaq tantiyakuq runami itsanqa alli kaqllata parlan.
20 Alli runa parlanqanqa imayka yuraq qellaynömi välin.
Mana alli runa parlanqanmi itsanqa ni imapäpis välintsu.
21 Alli runa yätsiptinqa pïmaypis alli kawananpämi tantiyakun.
Mana alli runami itsanqa mana tantiyakuq kanqanpita wanun.
22 Tayta Diospa bendicionninwanmi imaykayuqpis kantsik.
Bendicionninta chaskirmi kushikuntsik.
23 Mana tantiyakuq runaqa llutanta rurarpis kushikunmi.
Yachaq runami itsanqa allita rurarnin kushikun.
24 Mana alli runataqa mantsarinqan kaqmi imapis päsan.
Alli runami itsanqa imatapis munanqanta tarin.
25 Ñakaykuna shukukuy wayranö shamurmi mana alli runata ushakätsin.
Alli runami itsanqa imanö ñakarpis salvakun.
26 Kiruta vinagri jimpätsinqannö y ñawita qoshni nanätsinqannömi qela runapis mandaqninpä uma nanätsiqnin kaykan.
27 Tayta Diospita mantsapakuq runaqa awkinyanqanyaqmi kawanqa.
Llutan ruraq runami itsanqa wallka watalla kawanqa.
28 Alli runakunataqa kushikuymi shuyaran.
Mana alli runakunatami itsanqa llakikuy shuyaran.
29 Tayta Diosmi pay munanqannö kawaqkunata imaykapitapis tsapan.
Llutan ruraq runakunatami itsanqa ushakätsin.
30 Alli runaqa ñakay shamuptinpis manami fracasanqatsu.
Mana alli runami itsanqa ushakanqa.
31 Alli runaqa pitapis shumaqmi yätsin.†
Mana alli runami itsanqa castigashqa kanqa.
32 Alli runaqa allikunallatami parlan.
Mana alli runami itsanqa llutankunallata parlan.