Fiestaman qayatsiq warmiman yachaq kayta tinkutsinqan
9
Yachayshi wayinta alli shäritsinä.Shumaq kananpäshi qanchis jorcunkunata llaqllaykur jawitsinä.
2 Wayi ushaypäshi uywakunata pishtaskir alli allita kusinatsinä.
Tsaynöpis alli vïnuta ruraskirshi mikuynintinta mësaman sirvitsinä.
3 Sirviskirnashi wätayninkunata kachanä marka janaqninman aywaykur qayakuyänanpä.
4 Qayakurshi niyänä: “¡Mana tantiyakuq chölukuna jipashkuna!
¡Fiestaman shayämuy!”
Mana yarpachakuqkunatapis qayarshi niyänä:
5 “Kusinanqä mikuyta mikuyänaykipä y ruranqä vïnuta upuyänaykipä fiestaman shayämuy.
6 Mana alli ruraykunata kachariyay.
Kacharirqa allimi kawayanki.
Yachaq runanö shumaq kawayay”.
Yachaq y mana yachaq runa imanö kanqanpis
7 Shimisapa runaqa corrigiptikipis ashllishunkimi.
Llutanta ruraykanqanta niptikipis ollqutupäshunkimi.
8 Mana respitakuq runaqa corrigiptikipis chikishunkimi.
Yachaq runami itsanqa corrigiptikipis kuyashunki.
9 Yachaq runaqa tantiyatsiptiki masmi tantiyakunqa.
Alli runaqa yachatsiptiki masmi yachakunqa.
10 Yachaq kaytaqa qallaykunki Tayta Diospita mantsapakurmi.
Santu Tayta Diosta reqiqkunaqa tantiyakuqmi kayan.†
11 Tantiyakuq karqa atska watami kawanki.
12 Yachaq karqa mas tantiyakuqmi rikakunki.
Mana cäsukuq karqa mana alli rikashqami kanki.
Mana tantiyakuq kayta juiciuynaq warmiman tinkutsinqan
13 Mana yachaq kayqa wasarima, juiciuynaq y upa warminömi kaykan.
14 Wayi punkunman o marka janaqninman karpis jamakun 15 tsaypa päsaq alli kawaqkunata inkitar ninanpämi:
16 “¡Mana tantiyaq chölukuna y jipashkuna!
¡Kayman shayämuy!”
Tsaynöllami mana yarpachakuqkunatapis qayar nin:
17 “Suwakuy yakuqa masmi mishkin.
Mikuypis pakayllapa mikushqaqa maypis mikukuy munaymi”.
18 Tsaynö ninqanta cäsukuqkunaqa manami musyayantsu wanuyänanpä kanqanta.