Tantiyakuq kananpä yätsinqan
8
Tantiyakuymi qayaykäshunki.Yachaymi wiyanaykita munaykan.†
2 Jirkankunachöpis y tinkuq nänikunachöpis shuyaraykäshunkimi.
3 Marka yaykuna jatun punku ñöpanchöpis shuyaraykäshunkimi.
Tsaypita qayakurmi nikämun:
4 “Runakuna, llapayki wiyayämänaykipämi qayakaykämü.
5 Mana tantiyakuq chölukuna y jipashkuna, tantiyakuq kayänaykipä noqapita yachakuyay.
6 Shumaq wiyayämay.
Mas väliq kaqkunatami tantiyatsiyäshayki.
Yätsinqäkunaqa llapanpis allimi kaykan.
7 Rasun kaqllatami yachatsiyäshayki.
Imaypis manami llullakütsu.
8 Llapan yachatsinqäkunapis Tayta Dios munanqannömi kaykan.
Pitapis manami engañätsu.
9 “Yachaq runaqa parlanqäkunata rasmi tantiyan.
Paykunaqa tantiyayanmi yätsinqäkuna alli kanqanta.
10 Qellaypä y qoripä yarpachakuyänaykipa trokinqa tantiyakuq y yachaq kayänaykipä yarpachakuyay.
11 Yachaq kayqa kuyayllapä perlaskunapitapis mas allimi kaykan.
Yachatsinqämanqa manami imapis tinkuntsu.
12 “Noqaqa yachaywan juntumi kaykä.
Yätsinqäkunaqa llapanpitapis mas allimi kaykan.
13 Tayta Diospita mantsapakuqkunaqa jutsa rurayta jaqiriyanmi.
Runa tukuqkunata y alabakuqkunataqa ajapämi.
Jutsa ruraqkunata y llullakuqkunataqa manami rikaytapis munätsu.
14 “Yätsinqäkunata chaskikurrämi imatapis runa shumaq ruran.
Noqapitarämi yachaqpis y munayyuqpis rikakun.
15 Noqa yanapaptïrämi reypis shumaq mandan y autoridäkunapis shumaq arreglayan.
16 Tsaynöllami noqa yanapaptïrä mayor runakunapis y yanapaqninkunapis shumaq mandayan.
17 “Kuyamaqkunataqa noqapis kuyämi.
Ashimaqkunaqa tariyämanmi.
18 Noqa yanapaptïmi imaykayuq y respitashqa rikakuyan.
19 Tantiyatsinqäqa allinnin kaq qoripitapis mas allimi kaykan.
Yätsinqäqa yuraq qellaypitapis mas allimi kaykan.
20 Imatapis alli kaqkunallatami rurä.
Manami imatapis mana alli kaqkunataqa rurätsu.
21 Kuyamaqkunataqa imaykayuq kayänanpämi yanapa.
Wayinkunacho manami ni imapis pishinqatsu.
22 “Imatapis manarä kamarmi Tayta Dios noqata kamamarqan.†
23 Kay patsapis manarä kaptinmi noqaqa kaykarqäna.
24 Lamarkunatapis manarä kamarmi noqata kamamarqan.
Tsay höraqa mayukunapis y pukyukunapis manarämi karqanrätsu.
25 Jirkakunata manarä kamarmi mas puntata kamamarqan.
26 Patsata, chakrata y allpata manarä kamarmi puntata kamamarqan.
27 Lamar jananman ciëluta kamaptinpis tsaychömi kaykarqä.
28 Ciëlucho pukutayta kamaptinpis y lamarman yakuta juntatsiptinpis tsaychömi kaykarqä.
29 Kuchunpita lamar mana päsananpä mandaptinpis y patsapa cimientunta churaptinpis† 30 payta yanaparmi tsaycho kaykarqä.
Noqata rikamarmi kushikurqan.
Paypa ñöpanchömi qoyay qoyay kushikurqä.
31 Kamanqan patsachömi pasaypa kushikurqä.
Runakunata kamaptinmi kushikurqä.
32 “Kuyay wamräkuna, llapaykikuna wiyayämay.
Noqata cäsukamarqa kushishqami kawayanki.
33 Yätsinqäta shumaq chaskikuyay.
Manakaqman ama churayaytsu.
34 Yätsinqäta wiyakuqkunaqa kushishqami kawayanqa.
Paykunami qoyay qoyay wayi punkücho shuyäyäman yätsinqäta wiyayänanpä.
35 Noqata chaskikamaqkunaqa alli kawaytami tariyanqa.
Paykunataqa Tayta Diosmi yanapanqa.
36 Noqapita witikuqkunataqa imapis päsanqami.
Noqata mana cäsukamaqkunaqa wanuymanmi chäyanqa”.