Runanta qanrataq warmi imanö kanqanpis
7
Hïju, ninqäkunata wiyakuy.Yätsinqäkunata mana qonqaypa yarparay.
2 Yätsinqäkunata cäsukurqa alli kawaytami tarinki.
Ñawi ñïñuykita cuidanqaykinö ninqäkunata cumpliy.
3 Imaypis yarparänaykipä makikiman watay.
Mana qonqänaykipä shonquykiman qellqay.
4 Yachayta niy: “Panïmi kanki”.
Tantiyaytapis niy: “Kuyanqä amïgämi kanki”.
5 Tsaynö paniki y amïgayki karmi runanta qanrataq warmipita tsapäshunki.
Alli shimillanpa parlapäkuq mañösa warmipitapis cuidashunkimi.†
6 Juk kutimi wayïpa ventänanpita rikachakuykarqä.
7 Tsaychömi rikarqä mana tantiyakuq chölukunata.
Paykunawanmi aywaykarqan wakinpitapis mas mana tantiyakuq chölu.
8 Paymi esquïnaman chaykur cällita päsarqan.
Nirkurmi mañösa warmipa wayin kaqpa aywarqan.
9 Tsay höraqa mana reqinakuy höranami karqan.
10 Mañösa warmiqa illaqpitami yarqamurqan prostitütanö latsapan jatishqa millukaykachar y qemtsiparnin.
11 Tsay warmiqa caprïchunta rurarmi wayinchöpis pärantsu.
12 Tsaymi cällikunachöpis pläzakunachöpis y esquïnakunachöpis ichiran pitapis tinkunqan kaqta “kuyämi” nir makallakurkunanpä.
13 Tsay mana tantiyakuq chölutami makallakurkur mutsarqan.
Mana penqakuypami nirqan:
14 “Tayta Diostami awnirqä alli päsakuy sacrificiuta rupatsinäpä.
Awninqäta kanan junaq cumplir kusinanqä aytsapis listumi kaykan mikunantsikpä.
15 Tsaymi qamwan tinkuq yarqamushqä.
Tinkuyta munanqänöllami kanan tinkuskishqantsik.
16 Cämämanpis qopishqä lïnupita rurashqa kuyayllapä colchatami.
Tsay colchaqa Egiptupita apayämunqan fïnu lïnupitami kaykan.
17 Cämä mushkünanpämi mïrrata, áloeta y canëlata wiñashqä.
18 Kanan höra yaykushun warat kuyanakur jimanqantsikyaq kakunantsikpä.
19 Runäpis manami kaychötsu.
Payqa karupami aywashqa.
20 Atska qellayta apakurkurmi aywashqa.
Jatun killachörämi kutimunqa”.
21 Tsaynö parlapaykällarmi tsay chöluta awniskatsirqan.
22 Tsaymi jinan höra tsay chöluqa warmipa qepanta yaykurqan.
Pishtashqa kananpä camalman töru aywaqnö,
trampaman lluytsu yaykuqnö
23 y wanunanpä kanqanta mana tantiyaypa trampaman pishqu yaykuqnömi aywarqan.
Trampaman lluytsu yaykuptin shonqunta flëcha illaqpita tuksinqannömi paytapis illaqpita desgracia päsanqa.
24 Hïju, yätsinqäkunata shumaq tantiyakuy.
Ninqäkunata wiyakuy.
25 Tsay niraq warmiwanqa ama jatikaytsu.
26 Payta qatirarqa wanuytami tarinki.
Atskaqnami tsaynö engañaptin wanuyashqa.
27 Paypa wayinman aywaqkunaqa ushakäyanqami.