Pitapis mana garantizananpä yätsinqan
6
Hïju, reqinakunqaykitapis o jäpa runatapis garantizashqa karqa 2 kikillayki trampaman jeqakuykuqnömi kaykanki.3 Garantizashqa karqa salvakunaykipä penqakuyta jitaskir garantizanqayki amïguykita ninki jaqanta pägakunanpä.
4 Tiempu päsananta ama shuyaraytsu, tsaypa trokinqa ras pägakunanpä ninki.
5 Runapita lluytsu qeshpinqannö y trampapita pishqu salvakunqannö garantizanqaykipita salvakuy.
Qela runata yätsinqan
6 Qela runa, ñuyäshukunaa mana qelanaypa arunqanta rikay.
Imanö aruyanqantapis rikar yachakuy.
7 Ñuyäshupaqa manami mandaqnin ni patronnin ni capatazninpis kantsu.
8 Tsaynö kaykarmi usya killacho cosëcha kanqanyaq mikuyninkunata qorikuyan.
9 Qela runa, ¿imay hörayaqrä punukunki?
¿Imay hörayaqrä jitaräkunki?
Jinchi armashqa suwa suwapäshuptiki jinaylla rikakuqnömi kanki.†
Mana alli ruraqkuna imanö kayanqan
12 Mana alli runa y llutan ruraq runaqa pïmaytapis llullaparmi purin.
13 Tsaynö runaqa ñawinwanpis, chakinwanpis y dëdunwanpis sëñapaytami yachan.
14 Llutankunallata yarpachakurmi pïmaytapis rimanakatsir y maqanakatsir purin.
15 Tsaynö kanqanpitami paytaqa ima desgraciapis illaqpita tsarinqa.
Mana yarpashqatami chipyaq ushakanqa.
Tayta Diosta imakuna ajanätsinqan
16 Qanchis mana alli ruraykunapitami Tayta Dios pasaypa rabyakun:
17 runa mayinta manakaqman churayanqan,
llullakuyanqan,
jutsaynaq runakunata wanutsiyanqan,
18 llutankunata rurayänanpä yarpachakuyanqan,
jutsa rurayllaman uman churakashqa kanqan,
19 testïgu kar manakaqkunata tumpayanqan
y wawqipurata chikinakatsiyanqan.
Jukpa warminwan mana kakunanpä yätsinqan
20 Hïju, taytayki yätsishunqaykita imaypis yarparay.
Mamayki yachatsishunqaykitapis ama qonqaytsu.
21 Nishunqaykita shonquykicho imaypis tsararay.
Kunkaykimanpis tsaykunata wallqakuy.†
22 Maypa aywaptikipis allita ruranaykipämi yätsiyäshunki.
Punuptikipis tsapäshunkimi.
Rikchaskiptikipis alli yarpaytami qoshunki.
23 Yätsikuykunaqa imayka chiwchinö y yachatsikuykunaqa imayka aktsinömi kaykan.
Tantiyatsikuykuna y yachatsikuykunaqa alli kawaymanmi apakun.†
24 Yätsikuykunata cäsukurqa runanta qanrataq warmipita witikunkimi.
Tsay niraq warmi inkitashuptikipis manami cäsupankitsu.
25 Kuyanayllapä kaptinpis manami rikapankitsu.
Qemtsipäshuptikipis manami cäsupankitsu.
26 Prostitütawan kakurqa imaynaqmi rikakunki.
Runanta qanrataq warmiwan kakurqa wanuymanmi chanki.
27 Pipis shanshaykaq carbonta oqllakurqa ¿manatsurä latsapanta rupakunman?
28 Shanshaykaq carbonta jarurqa ¿manatsurä chakinta rupakunman?
29 Tsaynöllami juk runapa warminwan kakuq runapis mana alli kawayman chanqa.
30 Juk suwa pasaypa mallaqar suwakuptinqa ama pipis manakaqman churatsuntsu.
31 Tsaynö kaptinpis suwakuykaqta tariskirmi itsanqa qanchis kuti masta pägakatsiyanqa.
Tsaymi llapan imaykantapis rantikuskir pägakunqa.
32 Suwakuq runa mana tantiyakuq kanqanpitapis jukpa warminwan kakuq runaqa mas peormi mana tantiyakuq kaykan.
Tsaynö runaqa kikillan ushakätsikuqnömi kaykan.
33 Tsaynö kanqanpitami paytaqa ashlliyanqa y maqayanqa.
Wanunqanyaqmi pïmay rikaytapis munayanqatsu.
34 Warmipa runan musyaykurqa pasaypa ajanarninmi tsay runata perdonanqatsu.
Mana kuyapaypami imay karpis maqanqa.
35 Aykata pägaptinpis ni imata qaraptinpis ajanaynin manami qallqunqatsu.