Mañösa warmipita witikunanpä tantiyatsinqan
5
Hïju, yätsinqäkunata shumaq wiyakuy.Yachatsinqäkunata imaypis yarparay.
2 Tsaynöpami shumaq tantiyakuykur imatapis parlanki.
3 Mañösa warmiqa mishki mishki parlaparmi pitapis inkitan.
4 Paywan jatikarqa ima desgraciamanpis ishkinkimi.
Ishkan waqtanpa afilashqa espädawan tuksishqanömi kanki.
5 Manaräpis unaytami ushakanki.
Wanuypis janaykichönami kanqa.
6 Tsay warmiqa alli kawananpäpis manami yarpachakuntsu.
Imanö kawaykanqantapis manami tantiyakuntsu.
7 Hïju, tsaynö kaykaptinqa yätsinqäkunata shumaq wiyamay.
Yachatsinqäkunata mana qonqaypa yarparay.
8 Mañösa warmipitaqa witikuy.
Ama ni wayi punkullanmanpis aywaytsu.
9 Mañösa warmiwan kakuptikiqa llapan imaykaykikunapis jukpämi kanqa.
Mana alli runakunapa makinchömi wanunqaykiyaq ñakanki.
10 Ñakar arunqaykipis mana reqinqayki runakuna imaykayuq kayänanpämi kanqa.
Arupakur tarinqaykipis jukllapämi kanqa.
11 Tsaymi waray warantin awkinyar llakikurnin waqanki.
12 Tsaynö ñakarmi ninki: “¿Imanirrä corrigimanqanta cäsukurqätsu?
¿Wanushqatsurä karqä yätsimanqanta mana chaskikunäpä?
13 Yachatsimaqnïkunatapis manami wiyakurqätsu.
Tantiyatsimaqnïkunatapis manami cäsukurqätsu.
14 Pïmaypis rikaykäyämanmi desgraciacho kaykanqäta.
Ichikllapami wallkalla kapamanqantapis oqraykushqä”.†
15 Warmillaykiwan contentakunki.
Payqa chuya pukyuykinömi kaykan.
Tsay pukyullaykipita upukunki.
16 Cällikunapa y pläzakunapa aywaq yakuta mana upunqaykinö juk warmiwan ama kakuytsu.
17 Tsaypa trokinqa warmillaykiwan kakuy.
18 Tayta Dios kamaripäshunqayki warmiqa bendicionmi qampä kaykan.
Tsaynö kaptinqa chölu kanqaykipita patsa tanqayki warmillaykiwan contentakunki.
19 Payqa kuyayllapä lluytsunömi kaykan.
Kuyashunqaykillawan imaypis contentakunki.
20 Hïju, warmiyuq kaykar ¿imanirrä juk warmiwan kakunkiman?
¿Imanirrä mana warmiki kaykar juk warmi makallaräshunkiman?
21 Tayta Diosqa imanö kawanqantsiktapis musyaykanmi.
Payqa imata ruranqantsiktapis rikaykanmi.
22 Jutsa ruraqkunaqa jutsanpitami ñakayan.
Jutsata rurayanqanpitami waskawan watashqanö kayan.
23 Mana wiyakuq kayanqanpitami wanuyanqa.
Mana tantiyakuq kayanqanpitami ushakäyanqa.