Allita rurar kawananpä yätsinqan
4
Wamrakuna, taytayki yätsiyäshunqaykita shumaq wiyakuyay.Yätsiyäshunqaykita chaskikurqa yachaq runami kayanki.
2 Noqaqa allita rurayänaykipämi qamkunata yachatsï.
Yachatsinqäkunata imaypis ama qonqäyaytsu.
3 Noqapis taytäpa makinchömi wiñashqä.
Mamäpis kuyamarmi wätamashqa.
4 Kuyamarmi taytä nimarqan:
“Yätsinqäkunata imaypis yarparanki.
Willanqäkunata cäsukurqa allimi kawanki.
5 Yachaq kayta imanöpapis ashiy.
Yachatsinqäkunata imaypis ama qonqaytsu.
6 Yachaytaqa kuyanki.
Imaypis ama kachankitsu.
Tsaynöpami llutan ruraykunaman jatikankitsu.
7 Yachaq kanaykipäqa ima ruraynikitapis jaqiriykur yachakuy.
8 Yachaq kaptikiqa pïmaypis respitayäshunkimi.
9 Yachaq karqa kuyayllapä corönashqanömi kanki”.
10 Hïju, yätsinqäkunata wiyakuy.
Wiyakurqa atska watami kawanki.
11 Shumaq tantiyakur kawanaykipämi yachatsï.
Alli nänipa purinaykipämi yachatsï.a
12 Alli nänipa purirqa manami mana alliman chankitsu.
Cörrirpis manami ishkinkitsu.
13 Yachatsinqäkunata mana qonqaypa ruray.
Tsaykunata cäsukurqa alli kawaytami tarinki.
14 Mana alli runakuna kawayanqannöqa ama kawaytsu.
Paykuna jutsata rurayaptinpis qamqa jutsata ama ruraytsu.
15 Mana alli rurayninta ama ruraytsu.
16 Tsay runakuna jutsata mana rurarqa jamaytapis manami tariyantsu.
Pitapis jutsata mana ruratsirqa punuytapis manami tariyantsu.
17 Mallaqaypanörä y yakunaypanörämi jutsa rurayta munayan.
Paykunaqa imanöpapis runa mayinta atacaytami munayan.
18 Alli runakunapa kawayninkunaqa patsa waraptin atsikyanqannömi kaykan.
Patsa warayllanta mas atsikyanqannömi tsay runakunapis qoyay qoyay shumaq kawayan.
19 Jutsa ruraq runakunapa kawayninkunaqa pasaypa tsakaykaqnömi kaykan.
Tsaynö karmi jutsata rurayanqantapis tantiyayantsu.†
20 Hïju, tantiyatsinqäkunata chaskikuy.
Ninqäkunata imaypis yarparay.
21 Yätsinqäkunata ama qonqaytsu.
Ninqäkunataqa imaypis umaykicho tsararay.
22 Ninqäkunata yachakuqkunaqa alli kawaytami tariyanqa.
Qeshyayänanpa trokinqa sänumi kawayanqa.
23 Shonquyki allita yarpaptinqa allimi kawanki.
Tsaynö kaykaptinqa llutanta mana yarpänaykipä shonquykita shumaq cuiday.
24 Runa mayikita ama tumpaytsu.
Imaypis ama llullakuytsu.
25 Jutsaman mana ishkinaykipä shumaq cuidakuy.
26 Imanö kawanqaykitapis shumaq tantiyakuy.
Nänipita mana yaqaypa aywaqnö imaypis allillata ruray.
27 Mana alli ruraykunataqa ama ruraytsu.
Jutsa ruraypita witikuy.