Yachaq kar alli kawananpä ninqan
2
Hïju, ninqäkunata shumaq wiyakuy.Mandamientükunata imaypis yarparay.
2 Yachaq kanaykipä wiyakuy.
Alli yarpayyuq kanaykipä yarpachakuy.
3 Cäsukuq kanaykipä llapan shonquykiwan mañakuy.
4 Qellaytawan qorita ashinqaykinö yachaq kayta ashiy.
5 Tsaynöpami Tayta Diosta reqir paypita mantsapakunaykipä tantiyakunki.
6 Yachaq kanaykipäqa Tayta Diosmi yachayta qarashunki.
Paypitami tantiyaytapis yachaytapis chaskinki.
7 Pay munanqannö kawaqkunataqa imapitapis tsapanmi.
Allita rurar kawaqkunataqa yanapanmi.
8 Payta cäsukuqkunataqa imaypis cuidanmi.
Payllaman yärakuqkunataqa imaypis rikanmi.
9 Tsaynöpami alli kaqta y mana alli kaqtapis tantiyanki.
Tsaynöpis maya mayalla kanki alli kaqkunata ruranaykipä.
10 Yachaq kaynikipis shonquykicho kaptinmi kushishqa kawanki.
11 Yachaq karqa llutan ruraykunata manami rurankitsu.
Tantiyakuq kaynikimi mana alli ruraykunapita tsapäshunki.
12 Yachaq kaykarqa manami jutsata rurankimantsu ni engañakuq runakunatapis criyinkimantsu.
13 Tsay runakunaqa allita rurayänanpa trokinmi mana alli ruraykunallaman uman churakashqa kaykäyan.
14 Jutsata rurarpis pasaypami kushikuyan.
Mana allita ruraykurpis taqllapänakuyanrämi.
15 Imaypis llutanta rurallarmi puriyan.
Allita rurayänanpa trokinmi manakaqkunata rurallar kawayan.
16 Yachaq karqa runanta qanrataq warmipitapis witikunkimi.
Alli shimillanpa parlapäshuptikipis ama cäsupankitsu.†
17 Tsay niraq warmiqa jipashllarä kaykar täyanqan runantapis jaqiriykurmi munanqancho purikun.
Tsaynö karmi runanta imaypis respitananpä Tayta Diosta awniykarpis qonqaykun.
18 Tsay niraq warmiwan purirqa wanuytami tarinki.
19 Tsay warmiwan kakuqkunaqa imaypis alli kawayta manami tariyanqatsu.
20 Hïju, Tayta Dios munanqannö kawaq runakunata rikarnin paykunanö kaway.
21 Jutsata mana ruraq runakunaqa Tayta Dios rikatsinqan nacioncho atska watami añaw kawayanqa.
22 Tsaynö kaptinpis mana alli runakuna y Diosta awnirkur mana cumpliqkunami itsanqa illaqpita wanuyanqa.†