24
“Llapanpä munayyuq Tayta Dios llapantapis rikaykarqa ¿imanirtä mana alli runakunata castigantsu?2 Mana alli runakunaqa chakrapa mujunninkunatapis wititsiyanmi.†
Suwakuy üshakunallatami mitsikur puriyan.
3 Waktsakunapa ashnuntapis qechuyanmi.
Viüdapa yuntantapis prendami tsarikurkuyan.
4 Muchuqkunataqa nänipa puriyänantapis michäyanmi.
“Tsaynö kayaptinmi maytsaychöpis muchuqkuna mantsar pakakuyan.
5 Tsunyaq jirkacho qewata chucaru ashnu ashinqannömi muchuqkunaqa mikuyta ashiyan.
Tsurinkunapäpis tsunyaq jirkallachömi mikuyta ashiyan.
6 Imankunapis mana kaptinmi trïgutapis üvatapis mana alli runapa chakrankunallacho pallapakuyan.
7 Punur qatakuyänanpä cäman mana kaptinmi alatsikur qallapächulla waräyan.
8 Jirkakunacho täyaptinmi tamyapis pasaypa shutunqanyaq ushman.
Tsaymi llantukuyänanpäpis qaqakunaman aywayan.
9 “Mana alli runakunaqa viüdapa tsayrä yurishqa wamrantapis apakuyanmi.
Muchuqkunapa imantapis prendami tsarikurkuyan.
10 “Muchuqkunaqa latsapaynaqllami puriyan.
Trïguta ashtapakurpis pasaypa mallaqarmi aruyan.
11 Yakunaypita wanunaykarmi aceitita jipiyänanpä aceitünasta aqapakuyan.
Vïnuta jipiyänanpäpis üvatami jarupakuyan.
12 Markacho pasaypa ñakatsiyaptin wanunar mañakuyaptinpis Tayta Dios manami cäsuntsu.
13 “Wakin runakunaqa Tayta Diosta mana cäsukurmi jutsata rurayan.
14 Wanutsikuq runaqa patsa tsayrä waraykaptinmi muchuqkunata wanutsin.
Patsa tsakaskiptinqa suwakuqnami aywayan.
15 “Majanta qanrataq runakunaqa patsa tsakaskinallantami shuyaraykäyan.
Patsa tsakaskiptinqa pipis mana reqinanpämi qaqllanta tsapakurkur aywayan.
16 “Suwakunaqa paqaspami wayikunaman suwakuq yaykuyan.
Pipis rikananta mana munarmi junaqpa pakaräkuyan.
17 Patsa waränantapis manami munayantsu.
Tsakaypami itsanqa mana mantsariypa puriyan.
18 “Mana alli runakunaqa yakunö päsaqllami kayan.
Chakrankunapis maldicionashqa kaptinmi üva chakrankunacho pipis aruntsu.
19 Pasaypa usyaptin rashta tsullur illakanqannömi jutsa ruraqkunapis wanur illakäyanqa.
20 Paykunataqa mamanpis qonqaykunmi.
Kurukunami mikur ushayanqa.
Qeruta mutur ushayanqannömi ushakäyanqa.
Tsaymi pipis paykunata yarpanqanatsu.
21 “Tsay mana alli runakunaqa qolluq warmikunata mana allimi rikayan.
Viüdakunatapis manami yanapayantsu.
22 Puëdiq kayaptinpis tsay runakunataqa Tayta Diosmi ushakätsinqa.
Paykunaqa manami imanöpapis salvakuyanqatsu.
23 Shonqun yarpanqannö kawayänanpä dëjarpis Tayta Diosqa imata rurayanqantapis rikaykanmi.
24 Mana alli runakunaqa juk rätullami alli kawayman chäyan.
Tsaymi manaräpis unayta ushakäyan.
Segashqa qewanömi wanuyan.
Segashqa trïgunömi ushakäyan.
25 “¿Tsaynöku o manaku?
Ninqäkunaqa rasunpaypami kaykan.
Tsaynö kaykaptinqa parlanqäta ama pipis manakaqman churatsuntsu”.