Job ninqan
23
Tsaynö niptinmi Job nirqan:2 “Kananpis qallayashqallami yapay parlashä.
Tayta Dios castigamaptinmi llakishqa kaykä.
3 ¡Imanöparä musyayküman Tayta Dios maycho kaykanqantapis!
Musyarqa imanöpapis tsayman chämanmi.
4 Chaykurqa llapan yarpanqätachi nïman.
Tsaynöpis imanir ñakatsimanqantachi tapüman.
5 Pay tantiyatsimaptinqa tantiyämanchi.
6 Mantsaritsimänanpa trokinqa shumaqchi tantiyatsimanman.
7 Jutsaynaq runataqa manami castiganmantsu.
Tsaymi noqatapis wiyamar ‘jutsaynaqmi kanki’ nimanman.
8 “Rupay yarqamunan kaqläpa ashirpis Tayta Diosta manami tarïtsu.
Rupay jeqanan kaqläpa aywarpis manami rikätsu.
9 Norti kaqläpa ni sur kaqläpa ashirpis manami tarïtsu.
10 Payqa maycho kaykanqäta y imata ruraykanqätapis musyanmi.
Qoripa qanranta ninawan tsullutsiypa jipiptin püru quëdanqannömi noqapis ñakaykunawan probamaptin jutsaynaq quëdashä.
11 Noqaqa pay munanqannömi kawaykä.
Llapan yätsimanqantami cäsukuykä.
12 Leyninkunataqa imaypis cumplishqämi.
Ninqankunataqa qoyay qoyaymi shonqücho yarparaykä.
13 “Tayta Diosqa yarpanqantami imatapis ruran.
Pay niptinqa manami pipis tsapata churapantsu.
14 Imanö kanäpäpis yarpanqannöchi kamakätsinqa.
Munanqannöchi llapanpis kanqa.
15 Paypa ñöpancho karmi pasaypa mantsakä.
Tsaykunata yarparmi tsuktsukyä.
16 Tayta Dios castigamaptinmi valornïpis kannatsu.
Llapanpä munayyuq Tayta Diosmi pasaypa mantsaritsiman.
17 Ima allirä kanman yanaykaq paqas illakätsimaptin.
Ima allirä kanman mankapa sikinnö tsakay tsapaskamaptin.