Elifaz yapay ninqan
22
Tsaypitanami Temán partipita shamuq Elifaz nirqan:2 “Mayjina yachaq karpis ¿Tayta Diosta pillapis yanapanmantsurä?
3 Allillata ruraptiki llapanpä munayyuq Tayta Dios ¿kushikuntsurä?
Mayjina alli kanqaykipis ¿Tayta Dios munanqannötsurä?†
4 Manami Tayta Diosta cäsukur kawanqaykipitatsu castïguta chaskiykanki.
5 Tsaypa trokinqa jutsata ruranqaykipitami castigaykäshunki.
Jutsaykikunaqa poqushqanami kaykan.
6 “Qamqa capazchi marka mayikipa imantapis mana kuyapaypa prenda tsarikuq kanki.
Tsaynö rurar capazchi muchuqpa latsapantapis qechuq kanki.
7 Yakuta mañakushuptikipis capazchi qararqaykitsu.
Mallaqpä puriqkunatapis capazchi qararqaykitsu.
8 Qamqa imaykayuq y respitashqa kar capazchi imapis munayllaykicho kananpä kanqanta yarparqayki.
9 Viüdakunatapis capazchi yanaparqaykitsu.
Waktsakunatapis capazchi ñakatsirqayki.
10 Tsaynö kanqaykipitami kanan pasaypa ñakaykanki.
11 Tsaymi tsakäpakushqanö kar imanir ñakanqaykitapis tantiyankitsu.
Mayuman jeqar shenqaqnömi kaykanki.
12 “Llapanpita mas altuchömi Tayta Dios kaykan.
Mas janacho kaykaq qoyllurkunapitapis mas jananchömi kaykan.
13 Karucho kanqanta yarpar capaz qamqa nirqayki:
‘Tayta Diosqa imanö kanqätapis manami musyantsu.
Yanaraykaq tsakaqpitaqa ¿imanöpatä rikamunqa?
14 Pukutay rurincho kaykar y entëru ciëlucho pasyakuykarqa manami rikamantsu’.†
15 “Tsaynö nirqa ¿unay runakuna llutanta rurayanqannöku qampis rurayta munaykanki?
16 Cargashqa mayu imaykatapis apar illakätsinqannömi manaräpis hörancho wanuyashqa.
17 Llapanpä munayyuq Tayta Dios mana castigananpä kanqantami yarpäyarqan.
Tsaynö yarparmi niyarqan: ‘Tayta Diosta manami rikaytapis munayätsu’.
18 Tsaynö nir Tayta Diosta mana cuentayaptinpis pay yanapaptinmi imaykayuq rikakuyarqan.
¡Tsay runakuna yarpäyanqannöqa manami yarpätsu!
19 “Mana alli runakunata Tayta Dios castiganqanta rikarmi alli runakunapa shonqunkunapis atsikyarkunqa.
Jutsaynaq runakunapis asiparmi niyanqa:
20 ‘Imanö karpis chikimaqnintsik runakunaqa ushakäyashqanami.
Imaykankunatapis chipyaqmi nina ushashqa’.
21 “Tsaynö mana päsashunaykipä Tayta Dios munanqannö kaway.
Tsaynö kawarqa yapaymi bendicionta chaskinki.
22 Pay yachatsishunqaykita shumaq wiyakuy.
Llapan nishunqaykita shonquykiman churakuy.
23 Mana alli ruraykunata kacharir llapanpä munayyuq Tayta Dios munanqannö yapay kawaptikiqa paymi yanapashunki.
24 Allinnin kaq qorikimanpis ama yärakuytsu.
Tsaypa trokinqa allpatanö y mayucho qollushtanö rikay.
25 Tsaykunaman mana yärakuptikiqa llapanpä munayyuq Tayta Diosmi yanapashunki.
Qoriyuq y atska qellayyuqkunapitapis mas allimi kawanki.
26 “Tsaynöpami llapanpä munayyuq Tayta Diosman yärakur kushishqa kawanki.
27 Payta mañakuptikiqa yanapashunkimi.
Yanapashuptikimi payta awninqaykitapis cumplinki.
28 Imata ruranaykipä yarpanqaykipis allimi kamakanqa.
Aktsichönö karmi kushishqa kawanki.
29 “Orgullösukunataqa penqakuymanmi Tayta Dios churan.
Qollmi shonqukunatami itsanqa yanapan.
30 Jutsaynaq runataqa salvanmi.
Jutsaynaq kaptikiqa qamtapis salvashunkimi”.