Job ninqan
21
Tsaynö niptinmi Job nirqan:2 “Ninqäta shumaq wiyayämaptikiqa shonqüpis kushikunqami.
3 Parlamuptï shumaq wiyayämänaykipä pacienciaykikuna kaykullätsun.
Asipäyämayta munarqa parlayta ushaskiptï asipäyämay.
4 “Noqaqa manami runatatsu reclamaykä, sinöqa Tayta Diostami.
Imanir ñakaykanqäta mana tantiyatsimaptinmi pacienciäpis kannatsu.
5 Parlapanqäta wiyamarmi pasaypa mantsarir shimikikuna tsapashqa wiyaräyanki.
6 Kikïpis tantiyayta mana kamäpakurmi pasaypa mantsakä.
Cuerpüpis pasaypami shiririn.
7 “¿Imanirrä mana alli runakunaqa wakinpitapis mas imaykayuq rikakuyan?
¿Imanirrä awkinyäyanqanyaq paykuna kawayan?
8 Tsurinkunata y willkankunata rikayanqanyaqmi kawayan.
9 Tsay runakunataqa Tayta Diospis manami castigantsu.
Wayinkunachöpis mana pipis wajupashqami kawakuyan.†
10 Törunkunapis alli padrïllumi kayan.
Wäkankunapis mana shulluypami mirayan.
11 Tsurinkunapis ashkashnörämi pañar cörrikachäyan.
12 Tamburkunata, arpakunata y flautakunata tukarmi cantarnin kushishqa tushuyan.
13 Tsay runakunaqa wanuyanqanyaqmi imaykayuq kaykäyan.
Mana ñakayllapami wanuyanpis.
14 “Mana alli runakunami Tayta Diosta niyan:
‘Añaw kawayänäpä kachaykayämay.
Munanqaykinöqa manami kawayta munayätsu’.
15 Tsaynöpis kaynömi niyan:
‘¿Pitä Tayta Dios payta sirvinantsikpä?
¿Imatatä jipintsik payta mañakunqantsikwan?’†
16 Tsaynö niyaptinpis imaykayuq kayanqanqa manami kikillankunapitatsu kaykan, sinöqa Tayta Diospitami.
¡Paykuna yarpäyanqannö manami ichikllapis yarpayta munätsu!
17 “Mana alli runakunataqa illaqpita wanuqta imaypis manami rikantsiktsu.
Paykunataqa imaypis desgracia manami päsantsu.
Paykunataqa Tayta Dios imaypis ajanar manami castigantsu.
18 Manami paykunataqa shukukuy wayra oqshata apaqnö illakätsintsu.
19 “Mana castigaptinmi runakunaqa niyan tsurinkunatana Tayta Dios castigananpä kanqanta.
Noqanami nï: Tsurinkunata castigananpa trokinqa kikin jutsa ruraqkunata castigatsun.
Tsaynöpami jutsata kachariyänanpä kikinkuna tantiyakuyanqa.
20 Kikinkunata desgracia päsatsun.
Llapanpä munayyuq Tayta Diospa castïgunwan ñakayätsun.
21 Wanushqana kaykarqa tsurinkunata castigaptinpis manami llakikuyanqatsu.
22 Tsaynö yarpaptïpis ¿pitä kantsik Tayta Diosta yätsinantsikpä?
Payqa ciëlucho kaqkunatapis juzganmi.
23 “Wakin runakunaqa añaw kawaykäyanqallanchömi wanuyan.
Kallpallancho kaykällarrämi ushakäyan.
24 Paykunaqa wanuyanqanyaqpis manami qeshyayantsu.
Wera werarämi kawayanpis.
25 Wakin runakunami itsanqa llakishqa kawaykäyanqancho wanuyan.
Paykunaqa kushishqa kawana kanqantapis manami musyayantsu.
26 Imanö kawarpis llapantsikmi ushakäshun.
Llapantsiktami kuru ushamäshun.
27 “Noqaqa musyämi imata yarpäyanqaykitapis.
Maliciaykämi llutanta parlaykanqäta niyämänaykipä kanqanta.
28 Shonquykikunacho yarparmi nikäyanki:
‘Manami Job ninqannötsu kaykan.
Job ninqannö kaptinqa ¿imanirtä mana alli runakuna imaykayuq karpis ushakäyan?
¿Imanirtä paykunapa wayincho taqkunapis desgracia päsaptin ushakäyan?’
29 “Tsaynö yarparpis ¿manaku parlayashqayki nänipa päsaqkunawan?
Paykunaqa maytsaypapis aywarmi imanö kanqantapis musyayan.
30 Tsaymi niyan:
‘Ima desgraciapis mana alli runataqa manami päsantsu.
Mana alli runaqa Tayta Diospa castïgunpitapis qeshpinmi.
31 Tsay runataqa manami llutanta ruranqanta pipis nintsu.
Llutanta ruraptinpis manami pipis castigantsu.
32 Wanuptinqa shumaqmi pampayan.
Pampayanqanchöpis täpayanrämi.
33 Pampaq apayaptin atskaq runakunami aywayan.
Paytaqa alli allpamanmi pampayanpis’.
34 “Qamkunaqa shakyätsiyämayta munarpis llutantami parlaykäyanki.
Llapan niyämanqaykipis wallällami kaykan”.