Zofar yapay ninqan
20
Tsaypitanami Naamat partipita shamuq Zofar nirqan:2 “Parlanqaykita wiyar manami upällakümantsu.
3 Qam parlanqaykiqa ajanätsimanmi.
Kananmi shumaq tantiyanqäta nishayki.
4 “Qam musyankimi runata Tayta Dios kamanqanpita patsa 5 jutsa ruraqkuna alli kawarpis ushakaqlla kayanqanta.
Jutsa ruraq runaqa juk rätullami kushishqa kaykan.
6 Tsay runaqa Tayta Diosnö kanqanta yarparmi runa tukun.
7 Tsaynö runa tukurpis kikinpa rakchannömi ushakanqa.
Tsaymi amïgunkunapis niyanqa: ‘¡Allaw, payta imatä päsaykushqa!’†
8 “Tsay runa suëñuychönölla ushakaptinmi pipis tarinqatsu.
Suëñunqanta runa qonqanqannömi paytapis qonqaykuyanqa.
9 Payta reqiqkunapis ni castankunapis manami imaypis rikayanqanatsu.
10 Muchuqkunapa jaqan kanqantapis tsurinkunanami pägakuyanqa.
Suwakunqantapis paykunami kutitsiyanqa.
11 Chölullarä kaykanqanchömi kallpasapa karpis ushakanqa.
Wanurpis allpamanmi tikranqa.
12 “Tsay runaqa alli mikuyta mishkilla mikur kushikunqannömi jutsata rurar kushikun.
13 Mishkita shoqur amuranqannömi jutsa ruraytapis jaqiyta munantsu.
14 Tsaynö jutsata ruranqanmi warayninkunaqa culebrapa venënunnö kanqa.
15 Riquëza qorinqankunatapis Tayta Diosmi ushakätsinqa.
16 “Jutsa ruraq runaqa culebrapa venënunta shoquqnömi wanunqa.
17 Tsaymi qoriyta mana atipanqanyaq mikuy wayuptinpis probichanqanatsu.
18 Llapan qorinqankunapis manakaqllapämi kanqa.
19 “Jutsa ruraq runaqa muchuqkunata wayinpita qarqurmi imaykantapis duëñu tukun.
20 Tsaynö rurarpis manami contentakuntsu.
Tsaymi imatapis munanqan kaqtaqa imaykanöpapis tarin.
21 Pasaypa ayrajashqa karmi kikillanpä imatapis qorin.
Tsaynö qorinqanpis llapanmi ushakanqa.
22 Mayjina imaykayuq karpis manami kushishqa kawanqatsu.
Paytaqa imayka desgraciapis päsanqami.
23 “Pasaypa ayrajashqa kaptinmi Tayta Dios ajanarnin mana kuyapaypa castiganqa.
24 Fiërru espädapita qeshpiptinpis bronci flëchawanmi wanutsiyanqa.
25 Tsay flëchakunami waqtanpa yaykur ñatinninpa päsanqa.
Tsaynöllami mantsariypä castïgu payman chanqa.
26 Tsay runapaqa imaykankunapis ushakanqami.
Pipis ninata mana tsariykätsiptinmi wayinta y kikintapis rupar ushanqa.
27 “Tsay runatami jutsanpita ciëlu shimpinqa.
Tsaynöllami kay patsapis llutan ruranqankunata ninqa.
28 Tayta Diosmi pasaypa ajanar castiganqa.
Bunyarrä juchu aywar imaykatapis ushanqannömi tsay runapa wayinkunatapis y imaykankunatapis ushakätsinqa.
29 Jutsa ruraq runata tsaynö castigananpämi Tayta Dios destinashqa”.