Job ninqan
19
Tsaynö niptinmi Job nirqan:2 “¡Imayyaqrä llakikatsimar manakaqkunata parlayanki!
3 Kutin kutin conträ parlarpis ¿manaku penqakuyanki?
4 Rasunpaypa jutsata rurashqa kaptïpis qamkunataqa ¿imatä qokuyäshunki?
5 Qamkunaqa noqapita mas alli kayanqaykita yarparmi jutsäpita ñakanqäta niyämanki.
6 Shumaq tantiyakuyay.
Mällanwan tsariqnömi Tayta Dios tsarimashqa.
7 “ ‘¡Wanuykätsiyämanmi!’ nir ausiliuta mañakuptïpis manami pipis salvamantsu.
Yanapamänanpä rugakuptïpis noqapäqa manami justicia kantsu.
8 Tayta Diosmi tsapata churapämashqa maypapis mana yarqunäpä.
Purinä nänitapis pasaypa tsakaymanmi tikratsishqa.
9 Llapan imaykäkunatapis paymi ushakätsishqa.
Tsaymi kananqa pipis respitayämannatsu.
10 “Michipitaa jachata jitariqnömi pasaypa desgraciaman Tayta Dios jitarpamashqa.
Tsaymi imata ruranäpäpis valornï kantsu.
11 Tayta Dios ajanarmi contrantanö castigamashqa.
12 Llapan soldädunkuna shamurmi tumaypa tsapayämashqa.
Wayïtapis jiruruypami tsaparaykäyan.
13 “Wawqïkuna y amïgükunapis noqapita witikurmi jäpa runatanöna rikayäman.†
Tsaynö kananpä Tayta Diosmi kamakätsishqa.
14 Castäkunapis manami watukayämannatsu.
Amïgükunapis chipyaqmi qonqäyämashqa.
15 “Wayïcho taqkuna y wätaynïkunapis jäpa runatanönami rikayäman.
Paykunapäqa mana reqishqa runanömi kaykä.
16 Wätaynïkuna yanapayämänanpä rugaptïpis manami cäsuyämantsu.
17 Jamaynï asyaptinmi warmïpis melanäman.
Wawqïkunapis rikamayta manami munayantsu.
18 “Wamrakunapis manakaqmanmi churayäman.
Ichirkuptïpis pasaypami asipäyäman.
19 Amïgükunapis manami cäsuyämannatsu.
Kuyanakunqä kaqkunapis chikiyämanmi.†
20 Pasaypa uyutashqa kaptïmi tullükunapis yupanakuykäyan.
Tsaymi wanuyllatana shuyaraykä.
21 “Amïgükuna kaykarqa kuyapaykayämay.
Tayta Dios castigamaptinpis qamkunaqa ama kachaykayämaytsu.
22 ¿Imanirtä qamkunapis Tayta Dios llakikatsimanqannö llakikatsiyämanki?
Rimayämanqaykiwan ¿manaku contentakuyanki?
23 “¡Pillarä ninqäkunata qellqaykunman!
¡Acta librumanpis qellqaykur churaykuyanman!
24 ¡Ima allirä kanman imaypis mana börrakänanpä rumiman cincelwan tallaypa qellqaykur plömuwan sellaykuptin!
25 “Noqaqa musyämi salvamaqnï kawanqanta.
Paymi abogädü kar kay patsacho janä shärinqa.
26 Aytsä ismur ushakaptinpis kawarkamurmi Tayta Diosta rikashä.
27 Manami juktsu rikanqa, sinöqa kikïmi ñawïwan rikashä.†
Tsay junaqta rikanäpämi shonqüpis kushikun.
28 “Qamkunaqa jutsata ruranqäta yarparmi imanöpapis jitapaykäyämanki.
29 Tsaynö kaptinpis kikikikuna castigashqa kayänaykipä kanqanta yarpachakuyay.
Tantiyakuyay Tayta Dios castigakuq kanqanta.
Jutsa ruraqkunataqa espädawanmi ushakätsinqa”.†