Bildad yapay ninqan
18
Tsaypitanami Súa partipita shamuq Bildad nirqan:2 “¿Imayyaqtä tsaynölla parlaykanki?
Shumaq parlanantsikpä tantiyakuyrä.
3 ¿Imanirtä uywatanö rikayämanki?
¿Imanirtä upa kayanqäta yarpanki?
4 Ajananqaykiwanqa manami imatapis jipinkitsu.
Alläpa ajanaptikipis kay patsa manami tsunyaqtsu rikakunqa ni qaqakunapis juklämantsu witikunqa.
5 “Jutsasapa runaqa aktsi upiqnömi illakanqa.
6 Wayinchöpis tsakayllami kanqa.a
7 Alli puriykaptinmi chankankunapis tsuktsukyanqa.
Runa mayinpä llutanta yarpanqanpis kikinmanmi chanqa.
8 “Tsaymi trampaman yaykuqnö kanqa.
Chakipita trampa tsarishqanömi kanqa.
9 Utsuputupita tsarishqanö karmi qeshpiytapis kamäpakunqatsu.
10 Paykunapä churanqan trampaqa mana rikakaqllami kaykan.
11 “Mana alli runataqa wakpita kaypitami imallapis mantsakätsin.
Manami imaypis añaw kawantsu.
12 Mallaqaywanmi kallpanpis ushakan.
Paytaqa ima desgraciapis päsanmi.
13 Qeri qeshyami entëru cuerpunta ushanqa.
Tsay qeshyawanmi rikranpis y chankanpis wanunqa.
14 Wayincho añaw kaykaqtami wanuy apanqa.
Tsaynöllami pasaypa ñakananpä kachaykunqa.
15 Wayinchöpis manami kikinpa wayinchönötsu tanqa.
Tsay wayimanqa azufritarämi jichanqa.b
16 “Mana alli runaqa michinc ismushqa y llimllan tsakishqa qerunömi kanqa.
17 Wanuskiptinqa chipyaqmi kay patsacho qonqaykuyanqa.
Cällikunachöpis manami pipis jutinta joqarinqanatsu.†
18 Atsikyaq patsapitapis tsakayman jitarpushqami kanqa.
Kay patsapitapis qarqushqami kanqa.
19 “Paypaqa manami tsurinpis ni willkanpis kanqatsu.
Tanqan markachöpis manami paypita aywaraqkuna täyanqatsu.†
20 Tsaynö päsanqanta pïmay musyarmi maytsaychöpis mantsakashqa kayanqa.
21 “Mana alli runakunaqa tsaynömi ushakäyanqa.
Tayta Diosta mana cäsukuqkunaqa llapanmi ushakäyanqa”.