17
“Jamaynïpis ushakaykannami.Wanuypis janächönami.
Pampakunäpä sepultürapis listunami kaykan.
2 Manakaqman churamaq runakunaqa ñöpächömi kaykäyan.
Paqaspapis junaqpapis ajanätsiyämanmi.
3 “Tayta Dios, janä shäriykullay.
Mana yanapamaptikiqa ¿pirä yanapamanqa?
4 Chikimaqnïkuna manakaqman churayämänanpä yarpätsishqa karpis vinciyämänanta ama munaykullaytsu.
5 Tsay runakunaqa pägupä raykuqmi amïgunpa contran shäriyan.
Paykunaqa tsurinkuna muchuycho kaykaqtami rikayanqa.
6 “Tayta Dios munaptinmi pïmaypis conträ parlayan.
Tsaynöllami qaqllämanpis toqapäyäman.
7 Nanaywan waqaptïmi ñawïpis tsakaskinna.
Uyutaptïmi custilläkunapis yupanakuykäyan.
8 “Tsaynö kanqäta rikamarmi alli runakunaqa mantsakäyan.
Jutsayuq runakuna conträ shäriyaptinmi ajanäyan.
9 Tsaynö ajanarpis alli runakunaqa imaypis allillatami rurayan.
Penqakuyman churayaptinpis mana ajayaypami allita rurayan.
10 “Llapayki yachaq tukuqkuna, shayämuy tapunakunapä.
Imaykata parlarpis manami mayqallaykipis rasunpaypa yachaqqa kayankitsu.
11 “Manaräpis unaytami wanukushä.
Imata ruranäpäpis yarpachakuykanqallächönami ushakäshä.
12 “Qamkunaqa mana allikunatapis alli kanqantami nikäyanki.
Pasaypa tsakaykaptinpis ‘patsa atsikyaykannami’ niqnömi kaykäyanki.
13 “Noqataqa wanuyllami tumapaykäman.
Wayïpis pasaypa tsakayllanami kanqa.
14 Sepultürami taytä kanqa.
Kurukunanami mamä y panïkunapis kayanqa.
15 Alli kawayta munanqäpis manakaqllapämi kanqa.
Tsaynö kaykaptinqa ¿imapänatä imata ruranäpäpis yarpachakushä?
16 Wanukuptïqa llapan yarpanqäpis manakaqllapämi kanqa.
Allpallamanmi llapantsikpis tikrashun”.