Job ninqan
16
Tsaynö niptinmi Job nirqan:2 “Qamkuna niyämanqaykitaqa atska kutimi wiyashqä.
Kushikatsiyämänaykipa trokin masmi llakikatsiyämanki.
3 ¡Imayyaqrä manakaqkunallata parlayanki!
¿Imachötä wajupashqä tsaynö niyämänaykipä?
4 “Noqapis sänu karqa qamkunanöllami nïman.
Asikurmi imaykatapis shimï tarinqanta parläman.
5 Tsaynö kaptinpis parlanqäqa manami allitsu kanman.
Parlaparqa shumaqmi shakyätsïman.
Mana llakikuyänaykipämi alli shimillapa tantiyatsïman.
6 “Kay nanaynïqa imata parlaptïpis ni upällakuptïpis manami wiyantsu.
7 Tayta Diosmi kallpäta ushakätsishqa.
Llapan amïgükunatapis wakpa kaypami qarqushqa.
8 Qaqllä shiktukanqanta y pasaypa uyutanqätami pïmaypis rikaykan.
Kaynö ñakaykaqta rikamarmi jutsata ruranqäpita ñakaykanqäta yarpäyan.
9 “Chucaru uywa atacaqnömi noqatapis Tayta Dios atacaman.
Ajanarmi mana kuyapaypa ñakatsiman.
Kachkachyayparämi ajanan.
Chikimaq runanömi nanaq ñawillanpa rikapaykäman.
10 Tsaymi runakuna qorikaykur conträ parlayan.
Tsaynöllami asipäyämar laqyayäman.
Llapanpis conträmi shäriyashqa.
11 Mana alli runakunapa munayninmanmi Tayta Dios churamashqa.
Jutsa ruraq runakunapa makinmanmi churaykamashqa.
12 “Ñöpataqa allimi kawarqä.
Tsaynö kaykaptïmi Tayta Dios illaqpita ñakayman churamashqa.
Kunkapita llapiraqnömi ñakaykätsiman.
Flëchawan flëchamaqnömi atacaykäman.
13 Flëchaqninkunawanpis wakpita kaypitami flëchatsiman.
Mana kuyapaypami rurunnïkunatapis tuksimashqa.
Ayaqnïtapis pashtarmi patsaman jichashqa.
14 Kutin kutinmi Tayta Dios ñakatsimashqa.
Contranta atacaq soldädunömi mana kuyapaypa atacamashqa.
15 “Tsaymi pasaypa llakikur qachqa latsapata jatikushqä.
Nanaywan qoshpaptïmi umämanpis allpa juntashqa.
16 Pasaypa waqaptïmi ñawïpis pukayar jakashqa.
17 Llapan tsaykunami päsaykäman pitapis mana ñakaykätsiptï y llapan shonqüwan Tayta Diosta mañakuykaptï.
18 “¡Ay patsallay patsa!
¡Yawarnïta ama tsapaykullaytsu!
¡Kaynö ñakanqäta pïmaypis musyaykuyällätsun!
19 “Ima kaptinpis ciëlucho favornï parlananpä kaykanmi.
Paymi itsanqa yanapamanqa.
20 Amïgükuna conträ shäriyaptinpis Tayta Diosta waqaparmi payman yärakü.
21 Favornin parlaqta juk runa munanqannömi noqapis favornï parlaqta munä.
22 Noqaqa juk ishkay watallanami kawashä.
Imaypis mana kutimuqmi aywakushä.