Elifaz yapay ninqan
15
Tsaypitanami Temán partipita shamuq Elifaz nirqan:2 “Rasunpaypa yachaq karqa llutankunata manami parlankimantsu.
Tsaynöqa shimisapa runallami parlan.
3 ¿Yachaq runaqa shimin tarinqanta parlanmantsurä?
Tsaynö parlanqayki ¿imapätä välin?
4 Qamqa Tayta Diospitapis manami mantsapakunkitsu.
Paytami manakaqman churaykanki.
5 Shonquyki llutanta yarpanqanta parlarmi pitapis llutanta criyiykätsinki.
6 Manami noqatsu qamta condenaykä, sinöqa kikikipa shimillaykimi.
Contrallaykimi llapantapis parlaykanki.
7 “¿Adánpitapis mas puntata yurinqaykitaku yarpanki?
¿Jirkakunapis manarä kaptin kanqaykitaku yarpanki?
8 ¿Tayta Diostapis tantiyatsinqaykitaku yarpanki?†
¿Kay patsacho japallayki yachaq kanqaykitaku yarpanki?
9 Manami noqakunapita mas yachaqtsu kanki.
Noqakunaqa llapan musyanqaykitami musyayä.
10 Llapanta musyaq awkinkunapis yarpäyanqänömi yarpäyan.
Taytaykipitapis mas awkin karmi mas tantiyakuq kayan.
11 “Tayta Dios consulaykäshuptikiqa ¿imanirtä contentakunkitsu?
Shumaq parlapaykäyaptïqa ¿imanirtä chaskikunkitsu?
12 Chaskikunaykipa trokinqa ¿imanirtä yanayayparä ajananki?
¿Imanirtä ajanaptiki ñawikipis saltananrä?
13 ¿Imanirtä shimiki tarinqanta Tayta Diospa contran parlanki?
14 “Runaqa manami jukllayllapis jutsaynaq kantsu.
Runalla karmi imaypis jutsayuq kantsik.
15 Tayta Diosqa angelninkunamanpis manami yärakuntsu.
Paypäqa ciëlupis manami pürutsu.
16 Tsaymi runakunamanqa peorrä yärakuntsu.
Runaqa jutsasapa karmi yakunaypanörä jutsa rurayllapä yarpan.
17 “Kanan willanqäta shumaq wiyamay.
Kaway vïdächo rikanqätami willashayki.
18 Yachaq runakuna willayämaptinmi noqapis yachakushqä.
Tsay yachaq runakunaqa taytankunapitami yachakuyarqan.
19 Paykunapa taytankunatami kay nacionta Tayta Dios rikatsirqan.
Tsay witsanqa llutan yachatsikuq jäpa runakuna kay nacioncho manami kayarqantsu.
20 “Jutsa ruraq runakunaqa ñakayllachömi kawayan.
Paykunaqa manaräpis unaytami ushakäyanqa.
21 Mantsakaypä kaqkunallatami wiyapakuyan.
Kushishqa kaykäyaptinmi suwakuna illaqpita shamur suwapuyan.
22 Paqaspapis mantsa mantsallami puriyan.
Tsaynö karpis espädawan wanutsishqami kayanqa.
23 Wanuskiptin wiskurkunami mikuyanqa.
Wanuypitaqa manami qeshpiyanqatsu.
24 Pasaypa mantsarirmi llakikuyan.
Rey atacaptin mantsariqnömi mantsa mantsalla puriyan.
25 “Tsaynömi päsan llapanpä munayyuq Tayta Diospa contran shäriqkunata.
26 Paykunaqa escüdunwan tsapakuq alli chölunömi kaykäyan.
Kallpankunaman yärakurmi Tayta Diospa contran shäriyan.
27 Tsay runakunapaqa qaqllankunapis wiswinrämi y pachankunapis liwaranrämi.
28 “Tsay runakunapa markankunatapis ushakätsiyanqami.
Wayinkunapis tsunyaq raqällami rikakunqa.
29 Mayjina alli kawayänanpä yarpachakurpis alli kawaytaqa manami tariyanqatsu.
Riquëzankunapis ushakanqami.
Chakrankunapis wallkallanami kanqa.
30 “Tsay runakunaqa wanuypita manami qeshpiyanqatsu.
Tsakishqa raprakunata nina rupar ushanqannömi Tayta Dios pükaskiptillan ushakäyanqa.
31 Manakaqkunaman yärakur manami imatapis tariyanqatsu.
32 Manarä höran chämuptinmi wanurnin imayka tsakishqa jachanö ushakäyanqa.
33 Üva manarä poqur shushunqannö y olïvuspa waytan shushur ushakanqannömi ushakäyanqa.
34 “Diosta mana cäsukuqkunapaqa tsurinkunapis manami kanqatsu.
Chaskipakuq runakunapataqa wayinkunatapis rupatsiyanqami.
35 Tsay runakunaqa jutsata rurayänallanpämi yarpachakuyan.
Pitapis engañayänallanpämi yarpachakuyan”.