13
“Qamkuna rikayanqaykita noqapis rikashqämi.Qamkuna wiyayanqaykita noqapis wiyashqämi.
2 Qamkuna musyayanqaykitaqa noqapis musyämi.
Noqapis qamkunanömi kaykä.
3 “Noqaqa kikin Tayta Dioswanmi parlayta munä.
Llapanpä munayyuq Tayta Diostami tapukuyta munä.
4 Qamkunaqa llullapäyämarmi rasun kaqtaqa parlayankitsu.
Jampikuyta mana yachaq mëdicunömi kaykäyanki.
5 ¡Ima allirä kanman upällakuyaptiki!
¡Upällakurqa yachaq runanömi kayankiman!†
6 “Kanan tantiyatsiptï shumaq wiyayämay.
Kananmi imata yarpanqätapis tantiyatsiyäshayki.
7 “¿Imanirtä llullakur Diospa favornin kanqaykita yarpaykäyanki?
¿Imanirtä llutanta parlarpis allita parlayanqaykita yarpaykäyanki?
8 Kikillaykikunapäqa Diospa favorninchi kaykäyanki.
Tayta Diospa abogädun kaytachi munaykäyanki.
9 “¿Imanörä kayanki llullakuyanqaykita Tayta Dios shimpiyäshuptiki?
¿Runata criyitsiqnötsurä paytapis criyiratsiyta yarpäyanki?
10 Tayta Diospa favornin kayta munaykar llullakuyaptikiqa mana kuyapaypami castigayäshunki.
11 Castigayäshuptiki munayyuq kanqanta tantiyar ¿manatsurä mantsariyanki?
12 “Qamkuna parlayanqaykikunaqa imayka lliptanö ushakaqllami kaykan.
Yachaq tukuyanqaykipis manami imapäpis välintsu.
13 “Parlanqäta tantiyayänaykipä upällakuyay.
Llutanta parlaptïqa Tayta Dios juklla juzgamätsun.
14 Wanutsimayta munarqa wanutsimätsun.
Ima päsamänan kaptinpis manami mantsarishätsu.
15 Wanutsimänan kaptinpis paymanmi yärakushä.
Munanqannö kawanqätami kikintapis nishä.
16 Tsaynöpami kikin salvamanqa.
Jutsa ruraq runaqa tsaynö parlananpä manami valuranmantsu.
17 “Ninqäta shumaq tantiyakuyay.
Parlanqäta shumaq wiyayay.
18 Imata ninäpäpis shumaqmi yarpachakushqä.
Tsaymi rasun kaqllata nishä.
19 Manami pipis ‘jutsayuqmi kanki’ nir shimpimanmantsu.
Jutsäta tariptinqa wanunqäyaqpis upällallami kakushä.
20 “Tayta Dios, ishkayllata rugakushayki.
Mañakunqäta awnimaptikiqa qampita manami pakakushätsu.
21 Amana castigamaynatsu.
Amana mantsakätsimaynatsu.
22 Qayamaptikimi contestamushayki.
Puntata parlanäpä nimaptikipis yarpanqätami nishayki.
23 “Taytay, jutsä ima kanqantapis willaykallämay.
Llutan ruranqäkunatapis tantiyaykatsillämay.
24 ¿Imanirtä noqapita pakakunki?†
¿Imanirtä contraykitanö rikaykämanki?
25 Wayra tumaykätsinqan rapranölla kaykaptïqa ¿imanirtä ushakätsimayta munanki?
Tsakishqa oqshanölla kaykaptïqa ¿imanirtä qatikachaykämanki?
26 ¿Imanirtä castigamar llakikuyman churamanki?
¿Imanirtä chölullarä kar jutsata ruranqäpita ñakaykätsimanki?
27 Chakïkunatapis cadënakunawannömi watashqayki.
Imata ruraptïpis musyaykankimi.
Maypa aywaptïpis rikaykämankimi.
28 Imapis ismur ushakaykaqnömi ushakaykä.
Puyu ushashqa latsapanömi kaykä.