Job ninqan
12
Tsaynö niptinmi Job nirqan:2 “¡Qamkunallanachä yachaq kayanki!
¡Qamkuna wanuskiyaptikiqa pipis yachaq kanmannaräku!
3 Noqapis qamkunanöllaqa yachärächä.
Tsay ninqaykikunataqa ¿pitä mana musyantsu?
4 “Noqaqa manami jutsata rurartsu kawashqä.
Mañakunqätapis Tayta Dios wiyamashqami.
Kananqa amïgükunapis asipäyämanmi.
5 Kikinkuna mana ñakarmi ñakaptï manakaqman churayäman.
Shakyätsiyämänanpa trokinqa llakikatsiyämarmi qayapäyäman.
6 “Suwakunaqa ¿imanirtä ñakayänanpa trokin imaykayuq rikakuyan?
Tayta Diosta ajanätsiqkunapis ¿imanirtä mana mantsariypa kawayan?
Paykunaqa yarpäyan imanö kawayaptinpis Tayta Dios imaypis yanapanqantami.
7 “Jirka uywakunata y pishqukunata tapukuyay.
Paykunami willayäshunki.
8 Kay patsata y lamarcho pescädukunata tapukuyay.
Paykunami tantiyatsiyäshunki.
9 Tayta Dios kamanqankuna ¿manaku tantiyatsimantsik paypitarä llapanpis kanqanta?
10 Paypa munayninchömi llapan kamanqanpis kaykan.
Paypa munayninchömi llapan runakunapis kaykäyan.
11 “Qalluntsikwan mikuypa gustunta tantiyanqantsiknömi imata parlayanqantapis wiyar tantiyantsik rasun kaqta o manakaqta parlayanqantapis.†
12 “Mayor runakuna musyaq y yachaq kayaptinpis
y awkin runakuna tantiyaq kayaptinpis
13 Tayta Diosqa mas yachaq y munayyuqmi kaykan.
Paypitami yachaytapis tantiyaytapis chaskintsik.
14 Pay juchutsiptinqa manami pipis shäritsiyta kamäpakuntsu.
Carcelman runata wichqaptinqa manami pipis jipiyta kamäpakuntsu.
15 Pay mana tamyatsimuptinqa llapan qewami tsakin.
Pasaypa tamyatsimuptinqa juchupis aywanmi.
16 Munayyuq y tantiyakuqmi payqa kaykan.
Musyanmi pï engañakuq kanqanta y pï engañashqa kanqantapis.
17 “Tayta Diosmi alli yätsiqkunatapis mana tantiyakuq kayänanpä upayätsin.
Paymi juezkunatapis upayätsin.
18 Reykunatapis rey kayninpita qarqurmi watashqata prësu apatsin.
19 Sacerdötikunatapis sacerdöti kayninpitami qarqun.
Autoridäkunatapis autoridä kayninpitami jipin.
20 Shumaq yätsikuqkunatapis mana yätsinanpämi qonqätsin.
Mayor runakunapa yarpaynintapis upayätsinmi.
21 Respitashqa autoridäkunata manakaqman churayänanpämi kamakätsin.
Kallpasapakunatapis kallpaynaq kayänanpämi kamakätsin.
22 “Pipis mana musyanqantami Tayta Dios musyan.
Paypäqa tsakaypis junaq patsanömi kaykan.†
23 Paymi nacionkunata jatunyätsin y ushakätsinpis.
Runakunatapis maytsaypa qarquskirmi yapay qorin.
24 Mandaqkunapa yarpayninkunatapis qonqaykatsinmi.
Tsunyaq jirkacho oqrakashqa puriyänanpämi pantakätsin.†
25 Tsaymi imayka paqaschönö tapra tapra puriyan.
Machashqa runakunanömi tsanka tsanka puriyan”.