Zofar ninqan
11
Tsaypitanami Naamat partipita shamuq Zofar nirqan:2 “¿Manatsurä pillapis upällatsishunkiman?
¿Alläpa parlarku rasun kaqta parlanqaykita yarpanki?
3 ¿Tsaynö parlanqaykiwanku upällatsiyämayta munaykanki?
Tayta Diosta manakaqman churaptikipis ¿upällakuyänätaku yarpaykanki?
4 “Kikillaykipäqa yarpanqaykikuna allichi kaykan.
Jutsaynaq tukunqaykipis qampäqa allichi kaykan.
5 ¡Ima allirä kanman imanö kanqaykitapis Tayta Dios nishuptiki!
6 Aja kaptinpis ¡ima allirä kanman tantiyakuq kanaykipä yachatsishuptiki!
Tantiyatsishuptikimi musyankiman jutsata ruraptikipis wallkalla castigaykäshunqaykita.
7 “Tayta Dios yarpanqankunata ¿musyankimantsurä?
Llapanpä munayyuq Tayta Dios imanö kanqanta ¿tantiyankimantsurä?
8 Pay musyanqankunataqa manami imanöpapis tantiyayta kamäpakuntsiktsu.
Ciëlu mayyaq kanqanta mana musyashqapis Tayta Diosqa musyanmi.
Wanushqakuna maypa aywanqanta mana musyashqapis payqa musyanmi.
9 Kay patsapa kuchun maycho kanqanta mana musyashqapis payqa musyanmi.
Lamar mayyaq chanqanta mana mayashqapis payqa mayanmi.
10 “Juzgashunaykipä Tayta Dios prësu apatsishuptiki pipis janayki manami shäriyta puëdinmantsu.
11 Tayta Diosqa musyanmi pï llulla kanqanta y pï mana alli ruraq kanqanta.
¿Jutsa ruraqta mana castigananpä kanqantaku yarpanki?
12 Castigaptinpis mana tantiyakuq runaqa imaypis manami tantiyakunqatsu.
Mana tantiyakuq runa tantiyakuptinqa ¡mulapis wachanmanchi!
13 “Tayta Dios munanqannö kawanaykipä yarpachakur,
llapan shonquykiwan payta mañakur,
14 jutsa ruraypita witikur
y wayikicho pipis jutsata rurananta mana munarqa
15 mana penqakuypa y pitapis mana mantsariypami kawanki.
16 Tsaynö kawarqä manami ñakankinatsu.
Ñakanqaykikunata yarparpis mananami llakikunkinatsu.
17 Tsaymi llapan shonquykiwan pasaypa kushikunki.
Llakikuyniki päsaskiptin patsa waraqnömi shonquykipis atsikyarkunqa.
18 Tayta Dios alli rikashuptikimi imaypis payman yärakunki.
Tsaynöpis mana mantsariypami añaw pununki.
19 Punuptikipis manami imapis mantsakätsishunkitsu.
Atskaqmi amïguyki kayta munar shayämunqa.
20 “Jutsa ruraq runakunataqa manami pipis yanapayta munanqatsu.
Ñakaptin pipis manami kuyapanqatsu.
Paykunataqa wanuyllami shuyaraykan”.