10
“¡Kawaytapis pasaypami ajayashqä!Tsaymi llapan yarpanqäkunata nishä.
Imapita llakikunqätapis llapantami nishä.
2 Tayta Diostami nishä:
‘Amana castigamaynatsu.
Manana ajanätsinäpä ima jutsata ruranqätapis willaykallämay.
3 Kikiki kamaykämarqa ¿imanirtä pasaypa ñakaykätsimanki?
Mana alli runakunataqa ¿imanirtä yanapanki?
4 “ ‘Qamqa manami runakuna rikayanqannötsu rikanki.
Manami tantiyayanqannötsu imatapis tantiyanki.
5 Tsaynöpis manami yupashqa watalla kawayanqannötsu kawanki.
6 Tsaynö kaykarqa ¿imanirtä jutsäkunata ashiykanki?
7 Tsaynö ashiykanki jutsaynaq kanqäta musyaykarmi.
Qampa makikipita manami pipis salvamanqatsu.
8 “ ‘Kikikimi makikiwan kamamashqayki.
¿Tsaynö kaykarku kananqa ushakätsimayta munaykanki?
9 Mitullapita kamamanqaykita yarpaykullay.
Kananqa ¿allpaman tikratsimaytaku munaykanki?
10 “ ‘Lichita cuwäjuwan quësuyätsiqnömi cuerpüta rurashqayki.
11 Tullükunatapis anku aytsäkunatapis shumaqmi kamakätsishqayki.
Nirkurmi aytsätapis qarätapis yuritsishqayki.
12 Kuyamarmi kawayta qaramashqayki.
Alli kawanäpämi qoyay qoyay yanapamashqayki.
13 “ ‘Tsaynö kaptinpis tsayrämi tantiyä imanir tsaynö yanapamanqaykita.
14 Qamqa rikarämashqaykimi jutsata ruraptï castigamänaykipä.
15 Jutsata rurashqa karqa ¡allaw noqallä!
Jutsaynaq kaptïpis tsaynöllami ñakatsimanki.
Noqapäqa vïdapis manami vïdanatsu.
16 Runa tukuptïqa imayka leonnö atacamarmi munaynikiwan mantsakaypä kaqkunata ruraykämanki.
17 Acusamänayki raykuqmi ima achäquitapis ashiykanki.
Noqawanqa imaypis ajanashqallami kaykanki.
Soldäduwan atacaqnömi kutin kutin atacaykämanki.
18 “ ‘¿Imanirtä yurinäta munarqayki?
Pipis manarä rikamaptin wanuküman karqan.
19 Mamäpa pachallanpitana pampaykayämaptinqa imaypis mana yurishqanömi käman karqan.
20 “ ‘Ushakänäpäna kaykaptinqa ichikllapis kushishqa kawanäpä kachaykallämay.†
21 Wanukurqa imaypis mana kutimuqnami yanaraykaq tsakayman aywakushä.
22 Tsay patsaqa pasaypa tsakaymi kaykan.
Tsaynöpis pasaypa mantsariypämi kaykan.
Tsaychöqa manami aktsipis kantsu’ ”.