Bildad ninqan
8
Tsaypitanami Súa partipita shamuq Bildad nirqan:2 “¡Imayyaqrä tsaynö llutankunata parlanki!
Parlanqaykikunaqa shukukuy wayranömi kaykan.
3 Llapanpä munayyuq Tayta Diosqa manami yarpanqaykinötsu llutanta ruran.
Payqa imaypis alli kaqllatami ruran.
4 Capazchi tsurikikunaqa jutsata rurayanqanpita ushakäyashqa.
5 “Llapanpä munayyuq Tayta Diosman yärakuptiki,
kuyapäshunaykipä mañakuptiki
6 y jutsata mana ruraypa alli kaqllata ruraptikiqa
Tayta Dios yapaymi yanapashunki kushishqa kawanaykipä.
7 Tsaynöpis ñöpata imaykayuq kanqaykipita mas imaykayuqmi kanki.
8 “Unay runakuna imanö kawayanqanta musyanaykipä tapukuy.
Paykuna tantiyakuyanqannö qampis tantiyakuy.
9 Noqantsikqa qepa runami kantsik.
Paykunanöqa manami imatapis yachantsiktsu.
Kay patsachöqa llantuy päsaqnöllami kaykantsik.†
10 Tsaynö kaykaptinqa unay runakuna yätsinqankunata shumaq tantiyakuy.
11 “Yaku mana kanqanchöqa ututupis manami wiñantsu.
Qocha mana kanqanchöqa totörapis manami kantsu.
12 Jeqarpis yaku tsakiptinqa mana segaykäyaptinmi wakin qewapita mas puntata tsakin.
13 Tsaynöllami Tayta Diosta mana cäsukuqkunapis kikillankunapä yarpachakuykäyanqancho ushakäyan.
14 “Tsay runakuna imaykankunamanpis yärakuyanqanqa imayka pachkapa llikannöllami kaykan.
15 Pachkapa llikan yataykushqalla rachikaqnömi paykuna yärakuyanqanpis manakaqllapä kaykan.
16 Tsay runakunaqa kaykäyan mana alli qewakuna lloqlluypa lloqllur wiñar entëru huertaman juntaqnömi.
17 Tsaynöpis qewapa michinkunaa shaqaman yaykunqannömi kaykäyan.
18 Tsaynö kaptinpis michinpita llukiptin qewa ushakanqannömi paykunapis ushakäyan.
Tsaycho qewa kanqanta pipis mana yarpanqannömi tsay runakuna kawayanqantapis pipis yarpanqanatsu.
19 Alli kaykäyanqanchömi tsaynö ushakäyan.
Paykuna ushakäyaptinpis Diosta mana cäsukuqkuna maspis yuriyämunqami.
20 “Jutsa ruraqkunataqa Tayta Dios manami yanapantsu.
Alli runatami itsanqa imaypis yanapan.
21 Alli runa kaptikiqa qamtapis kushishqa kawanaykipämi yanapashunki.
22 Chikishuqnikikunatami itsanqa penqakuyman churanqa.
Paykunapa wayinkunatapis y tsurinkunatapis ushakätsinqami”.