7
“Musyanqantsiknöpis runaqa kay patsacho pasaypa ñakarmi kawan.Imayka arupakuq runanömi qoyay qoyay ñakan.
2 Tsaynö ñakarmi achaycho arur llantuta ashiq runanö kaykan.
Tsaynöpis arupakuq runa pägunta shuyaqnömi kaykan.
3 “Tsaynöllami noqapis killa killa kuyapaypä kaykä.
Pasaypa nanaywanmi paqaspapis warat ñakä.
4 Cämächo jitararmi nï: ¿Imay hörarä patsapis waraykunqa?
Tumar tikrar kaptïpis patsa manami warantsu.
Tsaymi yarpachakuykar warärïpis.
5 “Cuerpüta chipyaq qeri ushaptinmi kurupis pasaypa ishninrä.
Entëru cuerpüpitami poqrullana yarquykan.
6 Kawaynïqa kaykan telarcho awaq runa lanzadërata jitaptin juklla päsaqnömi.
Kawanäpä kanqantapis manami yarpänatsu.
7 “Tayta Dios, vïdä jamaynölla kanqanta yarpaykullay.
Mananami imaypis kushishqa kawashänatsu.
8 Waray warantin wanukuptï mananami pipis rikamanqanatsu.
Rikamayta munaptikipis mananami kashänatsu.
9 “Imayka pukutay yuriskamur illakaskiqnömi runapis wanur illakan.
Sepultürapitaqa manami pipis yarqamunnatsu.
10 Wanukuqkunaqa wayinman imaypis manami kutiyannatsu.
Watakuna päsaptinqa castankunapis qonqaykuyanmi.
11 Tsaymi upällaqa kakümantsu.
Alläpa llakikur llapan yarpanqäkunatami parlashä.
12 “Tayta Dios, ¿imanirtä ñakatsimänaykipä imay hörapis rikaraykämanki?
¿Lamarnö kanqäta yarparku tsaynö rikaraykämanki?
¿Lamarcho jatusaq mantsaypä uywa kanqätaku yarpaykanki?
13 Aybësis yarpachakü punur manana ñakanäpä kanqantami.
Tsaynöllami yarpä punur llakikuytapis qonqaykunäpä kanqanta.
14 Tsaynö yarpachakur punuykaptïmi mana allikunata suëñutsimanki.
Mantsariypä kaqkunatami rikatsimanki.
15 Tsaynö ñakatsimänaykipa trokinqa allimi kanman juklla wanuratsimaptiki.
16 ¡Kawaytapis manami munänatsu!
¡Imapänatä kawashäpis!
Jamaynö ushakaqlla kaykaptïqa amana ñakatsimaynatsu.†
17 “¿Runaqa imanatä kaykan pasaypa ñakaykaqtapis kawatsinaykipä?
¿Imanirtä runapä pasaypa yarpachakunki?†
18 ¿Imanirtä qoyay qoyay rikapaykanki?
¿Imanirtä kutin kutin pruebaykanki?†
19 Noqataqa mana kachaypami rikaraykämanki.
Toqaynïta ultanallätapis manami kachapämankitsu.
20 “Llapan runakunata rikaq Tayta Dios, jutsata ruraptïpis qampäqa manami imanantsu.
Pasaypa ñakatsimanqaykitaqa manami atipänatsu.
21 Wanukunäpäna kaykaptïqa ¿imanirtä jutsa ruranqäta perdonamankitsu?
Wanukuptïqa perdonamänaykipä ashimarpis manami tarimankinatsu”.