Job ninqan
6
Tsaypitanami Job nirqan:2 “Ñakanqäta y desgracia päsamanqanta qorirkur balanzawan pësaptïqa 3 lamar kuchuncho aqushapitapis masmi lasanman.
Tsaynö ñakar capazchi llutantapis parlaykushqä.
4 Llapanpä munayyuq Tayta Dios ñakatsimanqanqa venënuyuq flëchawan tuksimanqannömi nanaykan.†
Pasaypa mantsariypämi ñakaykä.†
5 “Qewacho karqa ashnupis manami jächinyantsu.
Mikunanpä kaptin törupis manami müyantsu.
Tsaynöllami noqapis mana ñakarqa imatapis parlakümantsu.
6 “Qam nimanqaykiqa kachiynaq mikuynö y runtupa yuraqninnö qamyami kaykan.
7 Imaypis ñakayta mana munaykarmi kananqa qoyay qoyay ñakaykä.
8 “¡Ima allirä kanman mañakunqänö Tayta Dios juklla ushakätsimaptin!
9 ¡Ima allirä kanman Tayta Dios juklla illakätsimaptin!
10 Pasaypa ñakarpis Tayta Dios ninqankunatami imaypis cäsukushqä.
Tsayllapitapis kushikümi.
11 Ñakayta awantanäpä kallpäpis manami kannatsu.
¿Imatanatä shuyäshäpis?
12 Noqaqa manami qaqanötsu ni broncinötsu mana sientiq kä.
13 Manami kallpatapis tarïtsu.
Yanapamänanpä manami pipis kantsu.
14 “Llapanpä munayyuq Tayta Diospita mana mantsapakuptinpis ñakaycho kaykaq amïguntsiktaqa kuyapaykushwanrämi.
15 Qamkunaqa amïgükuna kaykarpis kuyapäkuyta manami yachayankitsu.
Raqrapa atska yaku yurirkamur juklla päsariqnömi kaykäyanki.
18 Noqaqa tsunyaq jirkacho yakuta ashir oqrakashqanömi kaykä.
19 Temánpita y Sabápita aywaq negociantikuna tsunyaq jirkapa päsar yakuta ashiqnömi kaykä.
20 Raqracho yakuta mana tarirmi pasaypa llakikuyan.
21 Tsaynöllami noqapis pasaypa llakikü mana shakyätsiyämaptiki.
Ñakaykanqäta rikaykämar shakyätsiyämänaykipa trokinqa mantsakar manakaqkunatami parlapäyämashqayki.
22 “Ajanäyänaykipäqa manami qamkunata imatapis mañakushqätsu.
Manami qellaywan yanapayämänaykipäpis rugakushqätsu.
23 Manami chikimaqnïkunapita salvayämänaykipäpis mañakushqätsu.
Mana alli runakunapa munayninpita jipiyämänaykipäpis manami rugakushqätsu.
24 “Mä ima jutsata ruraykanqätapis tantiyatsiyämay.
Tantiyatsiyämaptikiqa upällakushämi.
25 Jutsa ruranqäta niyämanqayki rasunpaypa kaptinqa penqakur upällakümanmi.
Manakaqkunata niyämarmi itsanqa ajanätsiyämanki.
26 Capazchi pasaypa ñakar llutantapis parlashqä.
Llutanta parlashqa kaptïqa perdonaykayällämay.
Perdonayämänaykipa trokinqa ¿imanirtä manakaqta niyämashqayki?
27 Tsaynö kar qamkunaqa waktsata wanutsinanpä nirpis niyankimanmi.
Kuyanakuyanqayki amïguykitapis jaqiriyankimanmi.
28 “Shumaq yarpachakurqa tantiyakuyankimanmi llapan ninqäkuna rasun kanqanta.
29 Noqaqa manami jutsata rurashqätsu.
¿Imanirtä yarpäyanki jutsata ruranqäpita ñakaykanqäta?
30 ¿Llullakunqätaku yarpäyanki?
¿Imapis alli kanqanta o mana alli kanqanta manana tantiyanqätaku yarpäyanki?”