5
“¡Job, pillapis yanapashunaykipä jinchi qayakuy!Mä pillaqa wiyashunkikush.
Yanapashunaykipä manami ni angelpis kantsu.
2 Ajanashqa y qallayashqa karqa manaräpis unaytami wanunki.
Mana tantiyakuq runakunallami tsaynö kawayan.
3 “Rikashqämi mana tantiyakuq runa imaykayuq tikranqanta.
Itsanqa maldicionashqa kaptinmi imaykanpis chipyaq ushakan.
4 Tsay runapa tsurinkunata pipis manami yanapantsu.
Autoridäkunapis paykuna quejakuyanqanta manami arreglayantsu.
Pipis manami janan shärintsu.
5 Kashawan chakran mayjina qenchashqa kaptinpis imaynaqkunami murukuyninta apakuyan.
Llapan imaykantami muchuqkuna chipyaq ushakurkuyan.
6 “Runaqa ñakan mana allita ruranqanpitami.
Allita rurarqa manami ñakantsu.
7 Chispa saltaptin wayra imaypis apanqannömi runapis imaypis ñakan.
8 “Qamnö ñakarqa Tayta Diostami mañaküman perdonamänanpä.
Alliyätsimänanpämi payta rugaküman.
9 Milagrukunata ruranqantaqa yupaytapis manami atipantsiktsu.
Mantsakaypä ruranqantaqa tantiyayta manami kamäpakuntsiktsu.†
10 Paymi tamyata tamyatsimur chakrakunata ushmatsin.
11 Qollmi shonqukunata yanaparmi llakikuykaqkunatapis shakyätsin.
12 Astütu runa yarpanqantaqa manakaqmanmi churan.
13 Yachaq kanqanta runa yarpaptinpis manami rasunpatsu yachaq kanqanta musyatsin.
Yachaq runa mana allita rurananpä yarpaptinpis kikin ñakananpämi kamakätsin.†
14 Tsay runaqa junaqpa purirpis tsakaychönö purirmi ima problëmamanpis jatikan.
15 Muchuq runataqa mana alli runakunapita Tayta Diosmi salvan.
16 Tsaynö salvanqanta musyarmi ñakaqkuna kushikuyan.
Mana alli runakunami itsanqa ima niytapis mana kamäpakur llakikuyan.
17 “Kushishqami kawan Tayta Dios corriginqan runa.
Tsaynö kaykaptinqa llapanpä munayyuq Tayta Dios corrigishuptiki chaskikuy.†
18 Castigashunqaykiwan qeshyaptikipis alliyätsishunkimi.†
Corrigishunqaykiwan ñakaptikipis yanapashunkimi.
19 Qatinayllaman desgracia päsashuptikipis Tayta Diosmi salvashunki.
Imapis mana päsashunaykipämi tsapäshunki.
20 Muchuy chämuptinpis mallaqaypita mana wanunaykipämi yanapashunki.
Guërra kaptinpis espädawan mana wanutsiyäshunaykipämi tsapäshunki.
21 Runa maldicionashuptikipis manami imapis päsashunkitsu.
Desgracia shamuptinpis manami mantsarinkitsu.
22 Muchuy shamuptinpis manami mallaqankitsu.
Desgracia kaptinpis manami ñakankitsu.
Chucaru uywakunapis manami mantsakätsishunkitsu.
23 Chakraykipis manami rumiyanqatsu.
Chucaru uywakunapis manami wajupäyäshunkitsu.
24 Wayikichöpis kushishqami kawanki.
Uywaykikunapis manami ushakanqatsu.
25 Qampita aywaraqkunapis atskaq karmi jachakunanörä tsaytsika kayanqa.
26 Awkinyarpis hörayki manarä chämuptinqa manami wanunkitsu.
27 Tsaynö kanqantaqa musyantsikmi.
Tsayqa rasunpaypa kaqmi.
Shumaq tantiyakuy”.