Elifaz ninqan
4
Tsaynö niptinmi Temán partipita shamuq Elifaz Jobta nirqan:2 “Kanan parlapaptï ama ajanaytsu.
Tsaynö kaptinpis manami upälla kakümantsu.
3 Qamqa atskaqtami shumaq yachatsiq kanki.
Llakishqa runatapis shakyätsiqmi kanki.
4 Llutan ruraq runatapis allita rurananpämi tantiyatsiq kanki.
Mantsarir kaykaqkunatapis shakyätsiqmi kanki.
5 Tsaynö kaykarmi kikikita desgracia päsashuptikiqa juklla desvalurashqa rikakunki.
Kikiki ñakarqa pasaypami turbataykanki.
6 Tayta Diosta mantsapakuq runa kaykarqa ¿manaku payman yärakunkiman?
7 “¡Shumaq tantiyakuy!
Jutsaynaq runaqa manami ñakantsu.
Alli kawaq runataqa manami desgracia päsantsu.
8 Mana alli runami itsanqa imaypis ñakan.
Tsaytaqa ñawïpami rikashqä.
9 Tsay niraq runataqa Tayta Diosmi castigan.
Ajanarmi llapanta ushakätsin.
10 “Mana alli runataqa leonnö kaptinpis Tayta Diosmi munayninta qechun.
11 Munayniynaq rikakurmi mallaqaypita león wanunqannö wanun.
Maman wanuskiptin león mallwakuna maytsaypa mashtakäyanqannömi mana alli runapa tsurinkunapis mashtakäyan.
12 “Shapshapyayllapa rinrïcho willamanqantami yanqalla wiyashqä.
13 Punukashqa kaykarmi suëñuynïcho willamanqanta wiyashqä.
14 Pasaypa mantsarir tsuktsukyaptïmi tullükunapis takanakushqarä.
15 Wayra wallwallyämuqta mayaptïmi aqtsäpis ichikurkushqa.
16 Ñöpächo alma kaykaqta tantiyarmi llantuytanö rikashqä.
Chulluklla kaykanqan hörami yanqalla wiyarqä parlapämar nimaqta:
17 ‘Tayta Diospäqa ¿jukllayllapis jutsaynaq runa kantsurä?
Kamamaqnintsikpäqa ¿allillata ruraq runa kantsurä?
18 Angelninkunamanpis manami yärakuntsu.
Runaqa allpallapita rurashqa karmi puyunö llapiriyllapä kaykan.
20 Illaqpita illakarmi imaypis mana kutimuq aywakun.
Wanuskiptinqa jutintapis qonqaskiyanmi.
21 Kay patsacho ushakaqlla karmi Dios munanqannö kawananpä shumaq manarä yachakur wanuntsik’.