Yurinqanpita Job pësakunqan
3 “¡Imapärä yurirqäpis!
‘Ollqu wamrami yurishqa’ niyanqan paqas ama kanmantsu karqan.
4 Manarä yuriptï tsay junaq ushakanman karqan.
Tayta Diospis tsay junaqta ama ruranmantsu karqan.
Yurinqä höraqa patsapis ama waranmantsu karqan.
5 Tsay junaq mana chämunanpä pasaypa tsakay tsapakurkunman karqan.
Mantsaypä yana pukutaypis tsapaskinman karqan.
6 Yurinqä paqasqa patsapis ama waranmantsu karqan.
Tsay junaq ama kanmantsu karqan.
7 Tsay paqasqa pipis ama yurinmantsu karqan.
Llullu yuriptinpis ama kushikuyanmantsu karqan.
8 Leviatán waräkuyta† mandayta puëdiq brüjukunapis tsay junaqta maldicionayanman karqan.
9 Tsay tutaqa qoyllurkunapis wallälla patsa waränanta shuyäyanman karqan.
Tsay junaqpäqa patsapis ama waranmantsu karqan.
Rupay yarqamur ama atsikyanmantsu karqan.
10 Kaynö mana ñakanäpä tsay junaq mamäpa mädrinnin wichqakanman karqan.
11 “¿Imanirrä mamäpa pachancho kaykällarrä wanukurqätsu?
¿Imanirrä yuriskillar ushakarqätsu?
12 Yuriptï mamäpis millqaninman ama marqamanmantsu karqan ni chuchumanmantsu karqan.
13 Tsay höra wanukurqa imatapis mana musyaypami jitaräküman karqan.
14 Tsaymi jitaräküman karqan wanukuq reykunawan, mayor runakunawan y monumentuta shäritsiq runakunawanpis.
15 Tsaynöllami jitaräküman karqan atska qorita y atska qellayta palaciuncho tsararaq wanukuq runakunawanpis.
16 Shullu wamratanö pampaskayämanman karqan.
Mamanpa pachallancho wanushqa wamratanö pampaskayämanman karqan.
17 Wanukurqa mana alli runakunapis llutan ruraykunata jaqiriyanmi,
pasaypa aruqkunapis jamapäyanmi,
18 autoridäkuna ñakatsir arutsiyanqan runakunapis manami aruyannatsu
y capatazkuna ollqutupäyanqantapis manami wiyayannatsu.
19 Wanurqa muchuqpis y imaykayuqpis ushakäyanmi.
Tsaychöqa wataykunapis manami patronninkunapa munayninchönatsu kayan.
20 “Ñakar kawayänanpä kaykaptinqa ¿imapätä yuriyänanta Tayta Dios permitin?
Pasaypa llakishqa kawayänanpä kaykaptinqa ¿imapärä kawayänanta munan?
21 Paykunaqa wanuyta munarpis manami wanuyantsu.†
Pampakuy qellayta ashiqnö wanuyta ashirpis manami tariyantsu.
22 Tsay runakunaqa sepultüraman charrämi kushikuyanqa.
23 ¿Imapänatä Tayta Dios kawatsin llakishqalla kawayänanpä kaykaptinqa?
Kushishqa kawayta munaptinpis Tayta Dios manami kamakätsintsu.
24 “Llakishqallami waräpis qoyäpis.
Waqaptï yakunörämi weqïpis aywan.
25 Kanan ñakanqänö manami imaypis ñakayta yarparqätsu.
Llapan mantsanqäkunami kanan päsaykaman.
26 Manami jamayta ni punuytapis tarïtsu.
Alli kawanäpa trokinqa llakikullarmi kawaykä”.