Tapuptinmi nirqan: “Entëru munduta rikapakamunqäpitami shamuykä”.

3 Tsaymi Tayta Dios nirqan: “Sirvimaqnï Job noqa munanqänö kawanqanta ¿rikashqaykiku? Paynöqa manami pipis kantsu alli ruraq, munanqänö kawaq, alli sirvimaq y imachöpis jutsata mana ruraq. Jutsaynaq kaptinpis qamqa nimashqayki tsurinkunatawan imaykankunata ushakätsinäpämi. Ushakätsiptïpis noqallamanmi yärakamun”.

4 Tsaynö niptinmi Satanás nirqan: “Sänu karqa llapanchöpis Job cäsukushunkimi. Kawayninta salvayta munarmi itsanqa qamtapis ñëgashunki. 5 Kikinta qeshyawan ñakatsiptikiqa contrayki parlarmi ñëgashunki”.

6 Tsaymi Satanásta Tayta Dios nirqan: “Qamna imatapis ruray. Itsanqa ama wanutsiytsu”.

7 Tsaynö niptinmi Tayta Diospa ñöpanpita yarqur Satanás aywakurqan. Nirkurmi chaki puntanpita hasta uma jirkanyaq mantsaypä qeri qeshyawan Jobta qeshyatsirqan. 8 Jobpa qerin pasaypa sheqshiptinmi uchpaman jamaykur kanalla pakipiwan entëru cuerpunta jichkakurqan.

9 Tsaynö kaykaqta rikaykurmi warmin nirqan: “¿Jinallaku Diosman yärakuykanki? ¡Tayta Diosta maldicionaskir juklla wanukuy!”

10 Tsaynö niptinmi Job nirqan: “¿Imanirtä juiciuynaq warminö parlaykanki? Tayta Diospita bendicionta chaskir payman yärakunqantsiknö ¿manaku desgracia päsamashqapis payman yärakushwan?”

Tsaynö desgracia päsaptinpis Jobqa manami imallatapis llutanta parlarqantsu.

11 Jobpa kimsa amïgunkunami kayarqan Elifaz, Bildad y Zofar. Elifazqa Temán partipitami karqan. Bildadqa Súa partipitami karqan. Zofarnami Naamat partipita karqan. Jobta tukuyläya desgracia päsanqanta y pasaypa qeshyaykanqanta musyaskirmi shakyätsiyänanpä willanakur aywayarqan.

12 Karuläpita rikayaptinqa mana reqiypämi Job karqan. Pay kanqanta tantiyaskirmi pasaypa waqar latsapankunatapis rachirnin allpata junishpa jitayarqan umankunaman shushumunanpä. 13 Nirkurmi Jobwan iwal jamaräyarqan qanchis junaq qanchis paqas. Tsaycho jamararpis Job pasaypa nanaywan ñakaptin ima ruraytapis manami kamäpakuyarqantsu.