Job
Job ñakanqan
1
Uz partichömi juk runa Job jutiyuq tarqan.† Payqa llapan shonqunwan allita rurar y Tayta Diospita mantsapakurmi kawarqan. Manami ima jutsatapis rurarqantsu. 2 Tsurinkunami kayarqan kimsa warmi y qanchis ollqu. 3 Tsaynöllami karqan qanchis waranqa (7,000) üshankuna, kimsa waranqa (3,000) camëllunkuna, pitsqa pachak (500) yuntankuna, pitsqa pachak (500) ashnunkuna y atskaq wätayninkunapis. Tanqan kaqchöqa llapanpitapis mas imaykayuq y alli rikashqami karqan.4 Jobpa ollqu kaq tsurinkunami trukanakuypa qayatsinakur wayinkunacho qorikaykur alli allillata mikuyaq. Tsaymanmi kimsan paninkunatapis qayatsiyaq mikur upur qoyäyänanpä. 5 Tsaynö mikur ushaskiyaptinnami Jobqa tsurinkunata qayatsirqan paykunapä Tayta Diosta perdonta mañakunanpä. Tutalla shärikuskirmi tsurinkunapa jutincho sacrificiuta rupatsir nirqan: “Capazchi tsurïkunaqa jutsata rurayashqa. Tsaynöpis capazchi Tayta Diospa contranpis shonqunkunacho yarpäyashqa”.
6 Juk kutimi Tayta Diospa ñöpanman angelkuna chäyarqan. Tsaymanmi Satanáspis charqan.† 7 Tsaymi Satanásta Tayta Dios tapur nirqan: “¿Maypitatä shamuykanki?”
Satanásnami nirqan: “Entëru munduta rikapakamunqäpitami shamuykä”.
8 Tsaymi Tayta Dios nirqan: “Sirvimaqnï Job noqa munanqänö kawanqanta ¿rikashqaykiku? Paynöqa manami pipis kantsu alli ruraq, munanqänö kawaq, alli sirvimaq y jutsata mana ruraq”.
9 Niptinmi Satanás nirqan: “Manami debaldillatsu Jobqa sirvishunki. 10 Pipis payta yatananta mana munarmi castankunata y imaykankunatapis rikaykanki. Tsaynöpis chakrancho mikuyninkunaman bendicionta churaptikimi llapan runakunapitapis mas atska uywayuq kaykan. 11 Kanan maski imaykankunatapis qechuy. Tsaymi itsanqa contrayki parlar ñëgashunki”.
12 Niptinmi Satanásta Tayta Dios nirqan: “Llapan imaykankunatapis makikimanmi churamü. Kikinta itsanqa ama yatayllapis yataytsu”.
Tsaynö niptinmi Tayta Diospa ñöpanpita yarqur Satanás aywakurqan.
13 Juk kutichömi Jobpa llapan tsurinkuna mikur upur mayor wawqinpa wayincho kaykäyarqan. 14 Tsaynö kaykäyaptinmi juk wätaynin Job kaqman chaykur willarqan: “Yuntaykikunawan aruykäyaptï y ashnuykikunapis tsaycho mikuykäyaptinmi 15 illaqpita sabeo runakuna wätaynikikunata espädawan wanuskatsir uywaykikunata apakuyashqa. Noqallami qeshpimushqä willanäpä”.
16 Tsaynö willaykaptinmi juk wätayninpis chaykur Jobta nirqan: “Räyumi llapan üshaykikunata y mitsikuqnikikunatapis chipyaq wanutsishqa. Noqallami qeshpimushqä willanäpä”.
17 Manarä willayta ushaptinmi juk wätayninpis chaykur Jobta willar nirqan: “Kimsa grüpu caldeo runakuna shamurmi llapan camëlluykikunata apakuyashqa. Nirkurmi wätaynikikunatapis espädawan wanutsiyashqa. Noqallami qeshpimushqä willanäpä”.
18 Tsaynö willaykaptinmi mas juk wätayninpis chaykur nirqan: “Ollqu tsurikikuna y warmi tsurikikuna mayor tsurikipa wayincho mikur upur fiestata ruraykäyaptinmi 19 shukukuy wayra tsunyaq jirkapita chämur wayita juchutsir llapan tsurikikunata wanutsishqa. Noqallami qeshpimushqä willanäpä”.
20 Tsaymi Job pasaypa llakikur latsapanta rachirqan y aqtsantapis ruturqan. Nirkurmi patsaman lätakaykur Tayta Diosta adorar 21 nirqan:
“Mamäpa pachanpita qallapächu yurinqänöllami wanukurpis qallapächulla aywakushä.
Tayta Diosmi llapantapis qaramashqa.
Tsaynöllami llapantapis qechumashqa.
Tayta Dios alabashqa kaykullätsun”.
22 Tsaykuna päsaptinpis Jobqa manami jutsata rurarqantsu ni Tayta Diospa contran imatapis parlarqantsu.