Contran shäriqkunata Israel runakuna wanutsiyanqan
9
Rey Asuero apatsinqan ordinta cumpliyänanpä junaqmi Israel runakunata wanutsiyänanpä contrankuna kamarikushqa shuyäyarqan. Tsaynö shuyäyaptinpis manami paykuna yarpäyanqannötsu karqan, tsaypa rantinqa Israel runakuna tikrapurninmi vinciyarqan. Tsay junaq karqan chunka ishkay kaq killa chunka kimsa kaq junaqmi. Tsay killapa jutinmi karqan Adar. 2 Contran shäriqkunata tsay junaq atacayänanpämi rey Asuero mandanqan llapan provinciakunacho Israel runakuna qorikäyarqan. Tsayta rikaykurmi contrankunaqa pasaypa mantsarirnin atacaytapis kamäpakuyarqantsu.3 Rey Asuero mandanqan kaq llapan provinciakunacho Mardoqueo mas munayyuq kaptinmi maytsaychöpis pay ninqanta rurayaq. Tsaymi Mardoqueupita mantsapakurnin llapan provinciakunapa mandaqninkuna, reyta mandashiqninkuna y markakunapa autoridäninkunapis Israel runakunapa janan shäriyarqan. 4 Reypa palaciuncho wakinpita mas respitashqa kaptinmi Mardoqueuta mantsayarqan. Munayyuq kanqanqa maytsay provinciakunachömi musyakarqan. Tsaymi Mardoqueutaqa pïmaypis respitayarqan.
5 Jitapanqan junaqnami Israel runakuna contran shäriqkunata espädawan wanutsiyarqan. 6 Susa markallachömi wanutsiyarqan pitsqa pachak (500) runakunata. 7 Tsaynöllami wanutsiyarqan Parsandatata, Dalfónta, Aspatata, 8 Poratata, Adalíata, Aridatata, 9 Parmastata, Arisaita, Aridaita y Vaizatata. 10 Paykunaqa Amánpa chunka tsurinkunami kayarqan. Wanutsirpis paykunapataqa manami imantapis apayarqantsu.
11 Susa markacho aykaqta wanutsiyanqanta musyaykurmi tsay junaqlla rey Asuero 12 reina Esterta nirqan: “Susa markachömi Israel runakuna wanutsiyashqa pitsqa pachak (500) runakunata y Amánpa chunka tsurinkunatapis. Juk markallacho tsaytsika contran runakunata wanuykätsirqa wakin provinciakunachöqa aykaqtarä wanutsiyashqapis. Kanan ¿imatä mas kaykan mañakamänaykipä? Imata mañakamanqaykitapis awnishaykimi”.
13 Esternami nirqan: “Tayta rey, allimi kanman kanan junaq Israel runakuna contran shäriqkunata wanutsiyanqannölla waray junaqpis kay Susa markacho wanutsiyaptin. Tsaynöpis rugakushayki Amánpa chunka tsurinkunapa ayankunata qeruman toqritsinaykipä”.
14 Ester rugakunqannöllami Susa markacho Israel runakuna contrankunata waraynin junaqpis wanutsiyänanpä rey Asuero willakatsirqan. Tsaynöpis Ester rugakunqannöllami Amánpa chunka tsurinkunapa ayankunata qeruman toqritsirqan. 15 Tsaymi Adar killa chunka chusku junaqcho Israel runakuna Susa markacho yapay qorikäyarqan. Tsay junaqnami kimsa pachak (300) runakunata wanutsiyarqan. Paykunata wanutsirpis manami imantapis apayarqantsu.
16 Rey mandanqan provinciakunachöpis Israel runakuna qorikäyarqan contrankunapita washäkuyänanpämi. Tsaymi tikrapar wanutsiyarqan qanchis chunka pitsqa waranqa (75,000) runakunata. Tsaynö wanutsirpis manami imantapis apayarqantsu.
17 Provinciakunacho tsaynö rurayarqan Adar killa chunka kimsa kaq junaqmi. Chunka chusku kaq junaqnami Israel runakuna kushikurnin mikur upur fiestata rurayarqan. 18 Susa markacho taq Israel runakunanami itsanqa chunka kimsa junaqcho y chunka chusku junaqcho washäkuyarqan. Tsaynöpami paykunaqa chunka pitsqa junaqchörä kushikurnin mikur upur fiestata rurayarqan.
19 Tsaynöllami murallanni taksha markakunacho taq y jallqacho taq Israel runakunapis Adar killa chunka chusku junaqcho kushikurnin fiestata rurar jukninpis jukninpis mikuyta yawatsinakuyan.
Purim fiestata rurayänanpä Mardoqueo ninqan
20 Tsay päsanqankunatami Mardoqueo llapanta qellqarqan. Tsaypitanami rey Asuero mandanqan provinciakunacho taq Israel runakunaman karucho taptinpis cercacho taptinpis cartata apatsirqan. 21 Tsay cartachömi mandarqan cada wata Adar killa chunka chusku junaqcho y chunka pitsqa junaqchoa mana qonqaypa fiestata rurayänanpä.
22 Fiestata rurayänanpä tsaynö nirqan Israel runakuna contrankunata vincir kushikuyanqanta imaypis mana qonqäyänanpämi. Tsaynöpis nirqan fiestata rurarnin kushishqalla mikur upur jukninpis jukninpis mikuyta yawatsinakuyänanpä y muchuqkunata qarayänanpä. 23 Tsaymi Mardoqueo llapan ninqankunata Israel runakuna mana qonqaypa kananyaqpis rurayan.
24 Israel runakunapa contran shärirmi Agagpa castan Hamedatapa tsurin Amánqa suertita jitarqan Israel runakunata wanutsiyänanpä. 25 Rey Asuero kaqman aywaykur Ester rugakuptinnami juk ordinta qellqaskatsir apatsirqan Amánta ushakätsinanpä. Tsay ordinchömi nirqan: “Amánqa Israel runakunata ushakätsiyta munanqanpita kikin wanutsishqa katsun”.
Tsaynöpami Amántawan tsurinkunata wanuskatsir qeruman toqritsirqan. 26 Tsaykunata yarparmi Israel runakuna imaypis fiestata rurayan. Suerti jitaypa jutin Purim kaptinmi tsay fiestata Purim niyan. Pasaypa ñakayanqanta yarpar y imanö kayanqanta yarparmi Mardoqueo cartakunqannölla 27 tsay fiestata rurayan. Cartacho ninqannöllami Israel runakunapita aywaraqkunapis y Israel runa kayman yaykuqkunapis cada wata mana qonqaypa ishkay junaq tsay fiestata rurayan. 28 Tsay cartacho nirqan llapan Israel runakuna may provinciachöpis may markachöpis fiestata cada wata rurayänanpämi. Tsaynöpami Israel runakuna imaypis qonqäyantsu contrankunata tikrapar ushakätsiyanqanta.
29 Tsaymi tsay cartacho ninqannö Abihailpa tsurin reina Esterwan Mardoqueo mas juk cartatapis Purim fiestata rurayänanpä qellqayarqan. 30 Nirkurmi tsay cartata apatsiyarqan rey Asuero mandanqan juk pachak ishkay chunka qanchis (127) provinciakunaman. Tsay cartacho shakyätsirmi 31 punta kaq cartacho niyanqannölla Mardoqueuwan reina Ester mandayarqan Israel runakuna y paykunapita aywaraqkunapis tsay ninqan junaqkunacho Purim fiestata rurayänanpä. Tsaynöpis tsay cartachömi niyarqan Israel runakuna ayünuta rurayänanpäpis.
32 Purim fiestata rurayänanpä Ester apatsinqan cartaqa punta kaq cartacho Mardoqueo ninqannöllami karqan. Fiestata rurayänanpä mandanqantaqa llapantami libruman qellqayarqan.