Israel runakuna washäkuyänanpä ordinta apatsinqan
8
Israel runakunapa contran Amánta wanutsinqan junaqmi rey Asuero Esterta rikatsirqan Amánpa wayinkunata, chakrankunata, uywankunata y imaykankunatapis. Mardoqueo prïmun kanqanta Ester willaptinmi Mardoqueuta rey Asuero qayatsirqan. 2 Chaykuptinmi Amánpita qorinqan sellakunan sortïjata jatitsirqan. Tsaynöllami Esterpis Amánpa imaykankunata chaskinqanta Mardoqueupa makinman churarqan.3 Nirkurnami Esterqa rey Asuero kaqman yapay aywarqan rugakunanpä. Chakinman qonqurikuykurmi waqar rugakurqan Agagpa castan Amán ordenanqannö Israel runakunata mana wanutsiyänanpä. 4 Tsaynö rugakuptinmi rey Asuero qori väranwan pay kaqpa toqirqan. Tsaymi shärirkur Ester nirqan: 5 “Rugakunqäta awnimarqa y rasunpaypa kuyamarqa mandanqayki llapan provinciakunacho Israel runakunata mana wanutsiyänanpä Amán apatsinqan ordinta mana välinanpä niykullay. 6 Ordin ninqannö Israel mayïkunata wanutsiyaptinqa pasaypami llakikushä”.
7 Tsaymi Esterta y Mardoqueuta rey Asuero nirqan: “Israel runakunata wanutsiyänanpä yarpanqanpita maynami Amánta wanuskatsir ayanta toqritsishqä. Tsaynöpis Amánpa wayintawan chakrankunata qamtanami rikatsishqä. 8 Kananqa yarpäyanqaykinö noqapa jutïcho juk ordinta qellqayay Israel runakunapa favornin kananpä. Tsay ordinta sëllüwan sellayay. Sëllüwan sellashqataqa välitsiyanqami”.
9 Rey Asuero tsaynö nirmi secretariunkunata jinan höra qayatsirqan. Tsay junaq karqan kimsa killacho ishkay chunka kimsa (23) junaqmi.a Kimsa kaq killapa jutinmi Siván karqan. Secretariunkuna chaykuyaptinmi tsay ordinta Mardoqueo qellqatsirqan Israel runakunapä, reyta mandashiqninkunapä, llapan provinciakunapa mandaqninkunapä y rey mandanqan nacionkunapa autoridäninkunapäpis. Tsaynöpami tsay ordin karqan rey Asuero mandanqan juk pachak ishkay chunka qanchis (127) provinciakunacho taq autoridäkunapä. Tsay provinciakuna karqan India nacionpita qallaykur Etiopía nacionyaqmi. Pïmaypis tantiyananpämi ordinta qellqayarqan rey mandanqan llapan provinciakunacho taq runakuna parlayanqan idiömakunacho y imanöpis qellqayanqan estïluncho. Tsaynöllami qellqayarqan Israel runakuna parlayanqan idiömacho y qellqayanqan estïluncho. 10 Nirkurnami tsay ordinman rey Asuerupa jutinta qellqaykur sëllunwan sellayarqan. Tsaypitanami willakuqkuna apayarqan reypa allinnin cawallunkunata muntakurkur.
11 Tsay ordinchömi qellqararqan Israel runakuna maytsaychöpis qorikaykur atacaqninkunata wanutsiyänanpä y wanuskatsir imantapis apakuyänanpä. Atacaqninkuna may markapita y may provinciapita kaptinpis warmintinta wamrantinta llapanta wanutsiyänanpämi tsay ordin karqan. 12 Rey Asuero mandanqan llapan provinciakunachömi fëchata jitaparqan chunka ishkay kaq killa chunka kimsa kaq junaqchob wanutsiyänanpä. Tsay killapa jutinmi karqan Adar. 13 Tsaynöllami tsay ordincho qellqararqan maytsay markachöpis y provinciachöpis Israel runakuna kamarikuskir atacaqninkunata tsay junaq wanutsiyänanpä.
14 Rey mandaptinmi ordinta apaqkuna allinnin cawallukunata muntakurkur jinan höra aywayarqan. Tsaynöllami Susa markachöpis musyatsiyarqan tsay ordincho imata ninqantapis.
15 Mardoqueuqa palaciupita yarqamurqan azulcho yuraqyuq sotänan jatishqa, qori corönan jatishqa y granäti lïnu cäpan jatishqami. Rikaykurmi Susacho taq runakuna llapanpis kushikurnin büllata rurayarqan. 16 Israel runakunapis kushikuyarqan salvashqana kayanqanta musyarmi. Tsaymi pïmaypis Israel runakunata respitayarqan.
17 Maytsay provinciakunamanpis y markakunamanpis qellqanqan ordin chaptinmi Israel runakuna maytsaychöpis kushikurnin fiestata rurar mikuytapis rurayarqan. Wakin runakunaqa wanutsiyänanta mantsarirmi Israel runa kayman yaykuyarqan.