Israel runakuna Tayta Diosta mañakuyanqan
9
Tsay killallami ishkay chunka chusku (24) junaqcho ayunayänanpä Israel runakuna qorikäyarqan. Ayunarmi llapan runakuna qachqa latsapata jatikurkur umankunamanpis allpata wiñakuyarqan. 2 (Tsay witsanmi mana Israel warmikunawan majatsakäyanqanpita Israel runakuna rakikashqana kayarqan.) Qorikäyanqanchömi kikinkunapis y unay castankunapis jutsata rurayanqanta confesakuyarqan.3 Tsaycho kimsa höra ichiraykäyaptinmi Tayta Diospa leyninkunata llapan wiyayänanpä liyipäyarqan. Tsayta wiyaskirnami Tayta Diosta adorarnin jutsata rurayanqanpita kimsa höra perdonta mañakuyarqan.
4 Tsaypitanami levitakuna Josué, Bani, Cadmiel, Sebanías, Buni, Serebías, Bani y Quenani armayanqan tablaman yarkuskir Tayta Diosta llapan kallpanwan mañakuyarqan. 5 Nirkurnami levitakuna Josué, Cadmiel, Bani, Hasabnías, Serebías, Hodías, Sebanías y Petaías niyarqan: “¡Llapantsik ichiykur Tayta Diosnintsikta alabashun!”
Tsaynö nirmi Tayta Diosta mañakur niyarqan:
“Pïmaypis jutikita joqarir imaypis alabaykulläshuy.
Mayjina alabarpis munanqaykinöqa manami alabayätsu.
6 “Qamllami Tayta Dios kanki.
Qammi kamashqayki ciëluta y tsaycho llapan kaqkunatapis.
Tsaynöllami kamashqayki kay patsata y kay patsacho kaqkunata, lamarta y lamar rurincho kaqkunatapis.
Kawayta qoptikimi llapan kawaqkunapis kawayan.
Tsaymi ciëlucho llapan kaykaqkunapis adorayäshunki.
7 “Tayta Dios, qammi Abramta akrarqayki.†
Qammi Caldeacho kaykaq Ur markapita pushamurqayki.
Nirkurmi jutinta trukatsirqayki Abraham jutin kananpä.†
8 Abraham qamman yärakamunqantami musyarqayki.
Paywan pactuta rurarmi awnirqayki cananeo, heteo, amorreo, ferezeo, jebuseo y gergeseo runakuna täyanqan nacionkunata paypita aywaraqkunata rikatsinaykipä.
Imaypis cumpliq karmi awninqaykita cumplirqayki.
9 “Qammi rikarqayki Egiptucho unay castäkuna imanö ñakayanqantapis.
Tsaynöllami wiyarqayki Puka Lamar kuchuncho waqayanqantapis.
10 Mantsakaypä kaqkunata rurarmi Faraónta, sirviqninkunata y tsay nacioncho taq runakunatapis castigarqayki.
Tsaynö rurarqayki Israel runakunata ñakatsiyanqanpitami.
Tsaynöpami munayyuq kanqaykita maytsaychöpis runakuna musyayan.
11 Israel runakuna rikaykäyaptinmi lamartapis ishkayman rakirqayki.
Tsaymi paykunaqa tsakipana päsayämurqan.
Qatipaqninkunatami itsanqa imayka rumitanö lamarman jitarpurqayki.
12 Israel runakunataqa ichiraykaq pukutaywanmi junaqpa pushamurqayki.
Paqaspanami lunyaykaq ninawan atsikyaparqayki.
Tsaynöpami maypa aywayänanpäpis tantiyatsirqayki.
13 “Ciëlupita Sinaí jirkaman urämurmi paykunata parlaparqayki.
Alli kawayänanpämi ninqaykikunata, leynikikunata, estatütuykikunata y mandamientuykikunata entregarqayki.
14 Jamay junaqkuna jamayänanpämi ordenarqayki.
Sirvishuqniki Moiséswanmi mandamientuykikunata, estatütuykikunata y leynikikunata yachatsirqayki.
15 “Mallaqäyaptinpis ciëlupitami mikuyta kamaripämurqayki.
Yakunäyaptinpis qaqapitami yakuta pashtatsimurqayki.
Nirkurmi awninqayki naciontapis rikatsirqayki.
16 “Unay castäkunaqa mana wiyakuq karmi mandamientuykikunatapis cumpliyarqantsu.
17 Salvanaykipä milagrukunata ruranqaykitapis qonqaykurmi cäsukuyäshurqaykitsu.
Tsaynö mana wiyakuq karmi yapay wätay kayta munar Egiptuman kutitsinanpä juk mandaqtana churayta munayarqan.†
“Tsaynö kayaptinpis perdonakuq, alli shonqu, kuyapäkuq, mana juklla ajanaq y kuyakuq Dios karmi paykunata kacharirqaykitsu.
18 Paykunami fundiypa torïtuta ruraskatsir niyarqan: ‘Kay diosmi Egiptupita jipimaqnintsik’.
Tsaymi munanqaykipa aywayänanpä ichiraykaq pukutaywan junaqpa pushamurqayki.
Paqaspapis ichiraykaq ninawan atsikyaparqayki.
20 Espïrituykiwanmi paykunata shumaq tantiyatsirqayki.
Mikuyänanpäpis ujuq ujuqmi manáta kamariparqayki.
Yakunäyaptin yakutapis kamariparqaykimi.
21 Tsunyaq jirkachöpis chusku chunka (40) wata yanapaptikimi imapis pishirqantsu.
Latsapankunapis manami ushakarqantsu.
Ni chakinkunapis manami pushllurqantsu.
22 “Paykuna täyänanpämi nacionkunata y markakunata rikatsirqayki.
Rey Sehón mandanqan Hesbón nacionta y rey Og mandanqan Basán nacionta qechuskirmi trïbunpa trïbunpa herencianta rikatsirqayki.
23 Bendicionnikiwanmi paykunapita aywaraqkunapis qoyllurkunanö atskaq kayarqan.
Unay castankunata awninqayki nacionkunamanmi yaykatsirqayki.
24 “Tsayman yaykurmi herencianta chaskiyarqan.
Tsaycho taq cananeo runakunata vinciyänanpämi yanaparqayki.
Munanqanta rurayänanpämi tsaycho taq reykunata y markankunatapis makinkunaman churarqayki.
25 Tsaynöpami jinchi murallashqa markakunamanpis yaykuyarqan.
Nirkurmi alli wayuq chakrakunata, imaykayuqpis junta kaykaq wayikunata, yakuyuq pözukunata, üva chakrakunata, olïvus huertakunata y wakin früta huertakunatapis qechuyarqan.
Tsaychömi atska mikuy kaptin werayäyarqan.
Yanapaptikimi pasaypa kushishqa kawayarqan.
26 “Tsaynö yanapaykaptikipis mana wiyakuq karmi contrayki rikakur leynikikunatapis cäsukuyarqantsu.
Tsaymi cäsukushunaykipä willakuyaptin profëtaykikunatapis wanutsir pasaypa ajanätsiyäshurqayki.
27 Tsaymi chikiqninkunapa makinman kachariykuptiki pasaypa ñakatsiyarqan.
Llakikur mañakayämushuptikimi ciëlupita patsa kuyapämurqayki.
Tsaymi chikiqninkunapita salvayänanpä akranqayki runakunata kachamurqayki.
28 Chikiqninkunapita librina karmi yapay jutsata rurar ajanätsiyäshurqayki.
Tsaynöpami yapaypis kachariptiki chikiqninkuna pasaypa ñakatsiyarqan.
Tsaynö ñakar yapay mañakayämushuptikimi ciëlupita patsa kuyapämur kutin kutin salvarqayki.
29 “Leynikikunata cumpliyänanpä kutin kutin tantiyaykätsiptikipis paykunaqa chukru shonqu karmi mandamientuykikunatapis cäsukuyarqantsu.
Ordenanqaykikunata cäsukur alli kawayänanta munaptikipis manami wiyakuyarqantsu.
Mana wiyakuq karmi ninqaykikunata chaskikuyarqantsu.
30 “Tsaynö kaptinpis atska watami awantarqayki.
Tukuynöpa Espïrituyki yanapaptinmi profëtaykikunawan imaykanöpapis tantiyatsirqayki.
Tsaypis mana wiyakuq kayaptinmi juklä nación runakuna vinciyänanpä kacharirqayki.
31 Kuyapäkuq karmi chipyaqqa ushakätsirqaykitsu ni qonqaykurqaykitsu.
Qamqa alli shonqu y kuyapäkuq Tayta Diosmi kanki.
32 “Tayta Diosllä, qamqa kanki llapanpä munayyuq, mantsariypä y poderyuqmi.
Unay castäkunawan pactuta rurar awninqaykikunataqa mana qonqaypami imaypis cumplinki.
Tsaynö kaykarqa awninqaykinö yanapaykallämay.
Asiria nacionpa mandaqnin reykuna ñakatsiyanqanpita hasta kananyaqmi ñakaykäyä.
Tsaynömi mandamaqnï reykuna, autoridänïkuna, sacerdötïkuna, profëtaykikuna y unay castäkunapis ñakayarqan.
33 “Noqakuna jutsayuq kayaptïpis qamqa alli ruraq karmi ima päsayämaptinpis kachaykayämarqaykitsu.
34 Mandamaqnï reykuna, autoridäkuna, sacerdötikuna y unay castäkunapis leynikikunata manami cäsukuyarqantsu.
Tsaynöllami mandamientuykikunata yachatsiptikipis chaskikuyarqantsu.
Jutsata mana rurayänanpä nikaptikipis manami wiyakuyarqantsu.
35 Tsaynö karmi imaykayuq jatun nacionta munayninkunaman churaykaptikipis cäsukuyäshurqaykitsu.
Imaykayuq kayänanpä kamaripaykaptikipis jutsa ruraykunata manami kachariyarqantsu.
36 “Tsaynö kayanqanpitami noqakuna jukpa munayninchöna kaykäyä.
Murukur kushishqa alli kawayänanpä unay castäkunata rikatsinqayki nacionchömi kananqa wätay kaykäyä.
37 Tsaymi juk nacioncho reykuna chakräkunacho wayuqtapis apakuyan.
Noqakunatapis uywäkunatapis munayninchömi tsararäyäman.
Jutsata rurayanqäpitami tsaynö ñakayänäpä churayämarqayki.
Pasaypami ñakaykäyä”.
Tayta Diosta wiyakuyänanpä awniyanqan
38 (10.1) Levitakuna tsaynö mañakuyaptinmi runakuna niyarqan: “Tayta Diosta wiyakunantsikpä pactuta rurar kanan awnishun. Awninqantsikta qellqarkur imaypis cumplinantsikpä mandamaqnintsikkuna, levitakuna y sacerdötikunapis firmayätsun”.